پاکستان: د ګل بهادر او مجيد بريګيد ډلي په رسمي توګه منع شوې
۱۴۰۳ مرداد ۱۱, پنجشنبه
د پاکستان د کورنيو چارو وزارت په حواله د حافظ ګل بهاد او مجيد بريګيد وسله والو ډلو تر دوو کلونو پورې تر څارنې وروسته د ترهګرۍ ضد ملي ادارې (نيکتا) دغه ډلې د منع شويو ډلو په نوملړ کې شاملې کړي دي.
په دې ترتيب د نیکتا له خوا د منع شوې ډلو په فهرست کې د شاملو ډلو شمير ۸۱ ته رسېدلی دی.
د پاکستاند حکومت په حواله د دې ګام موخه دا ده چې په هېواد کې د وسله والو پر وړاندې مبارزه چټکه کړل شي.
د نيکتا د انترنت پاڼې په حواله د مجيد بريګيد پر ډلې د جولای پر ۱۸ او د حافظ ګل بهادر پر ډله د جولای پر ۲۵ نېټه په رسمي توګه بندیز لګول شوی دی.
حکومت ويلي دي چې په دې وروستيو مياشتو کې دواړو سازمانونو خپل فعاليتونه ډېر کړي دي او د هېواد امنيت او ثبات ته یې ګواښ متوجې کړی دی.
د پاکستان حکومت ادعا کوي چې د ګل بهادر، ډله د افغانستان له خاورې څخه فعاليت کوي او په دې وروستيو کې یې د پاکستان پر امنيتي ځواکونو يو شمير خونړي بريدونه کړي دي.
کابو لس ورځې تر مخه په بنو کې پر امنيتي ځواکونو د ترسره شوي بريد پړه د حافظ ګل بهادر ډلې سره تړاو لرونکې د «جيش فرسان» ډلې منلې وه. په دې بريد کې د لسو ځانمرګو په ګډون اته پاکستاني پوځيان هم ووژل شول.
مجيد بريګيد څرنګه ډله ده؟
مجيد بريګيد، د بلوڅانو د وسله والو ډلو د ځانمرګو بريد کوونکو څانګه ده چې ځانګړې موخه په بلوچستان کې د چين پانګونې ته زيان رسول دي.
دې ډلې د چين او پاکستان د اقتصادي دهلیز يا سي پيک پروژې په نخښه کړي او څو بريدونه یې کړي دي. په دې کې د پاکستان د اسعارو د تبادلې پر بازار، په کراچۍ کې د چين پر قونسلګرۍاو د کراچۍ پوهنتون پر يوه انستيتويت بريدونه شامل دي.
د ملګرو ملتونو د امنيت شورا په يوه تازه رپوټ کې د مجيد بريګيد او تحريک طالبان پاکستان يا ټي ټي پي ترمنځ د ممکنه لاس يو کولو خبره مطرح شوې ده.
د یادولو وړ ده چې د حافظ ګل بهادر، ډله يو وخت د «ګډ طالبان» يا ښو طالبانو په نوم مشهوره وه او د پاکستان په پخوانيو قبايلي سيمو کې یې د پاکستان مخالفو ډلو پر ضد فعاليت کاوه.
خو په دغه سيمو کې د پاکستان له لوري په پراخه کچه د پوځي عملياتو له پېل راهېسې دا ډله د دولت مخالفه شوې ده.
د حافظ ګل بهادر او مجيد بريګيد په رسمي توګه د منع شوې ډلې په توګه تر اعلانولو وروسته به د دې دواړو ډلو شتمنۍ ضبظ کړل شي او پر غړيو به یې د سفر او نور بندیزونه ولګول شي.
د ټي ټي پي د «خوارجو د فتنې» په نوم د يادولو حکم
د پاکستان د کورنيو چارو وزارت د يوې اعلامیې په جاري کولو سره ټولو ادارو ته لارښوونه کړې ده چې په خپلو ټولو رسمي ليکونو او اسنادو کې د تحريک طالبان پاکستان ډله د «خوارجو فتنه» وبلله شي.
د وزارت له خوا ويل شوي: «د تحريک طالبان پاکستان په داسې فعاليتونو کې ښکيلتيا ته په کتلو سره چې اسلامي عقيدې ته زيان اړوي او په اصل کې د اسلام د حقيقي تعليماتو او جوهر پر ضد دي، دا پريکړه شوې ده چې تر دې وروسته به دغه ډله د «خوارجو د فتنې» په نامه ليکل کیږي.»
د کورنيو چارو وزارت تشريح کړې ده چې د «خارجي» د اصطلاح له کارولو څخه موخه دا ده چې د دې ډلې اصليت او نظريه بربنډه شي.
ب. ص/ ن. ز (آژانسونه، دويچه ویله اردو)