لاوروف د افغانستان د سولي پروسې په اړه پاکستان ته روان دی؟
۱۴۰۰ فروردین ۱۷, سهشنبه
د پاکستان د بهرنيو چارو وزير شاه محمود قريشي د سه شنبې په ورځ (۲۰۲۱م کال د اپريل ۶مه) په يوه ويډيويي پيغام کي ويلي دي چي د روسيې د بهرنيو چارو وزير سرگي لاوروف به په دغه دوه ورځني سفر کي له لومړي وزير عمران خان او پوځ له مشر جنرال قمر باجوه سره ملاقات ولري.
د روسيې د بهرنيو چارو له وزير سره په دغه سفر کي د افغانستان له پاره د روسيې ځانگړی استازی ضمير کابلوف هم ملگری دی.
قريشي ويلي دي چي پاکستان او روسيه د افغانستان د سولي پروسې له پاره گډ کار کوي.
روسيې د افغانستان د سولي په پروسه کي د مخکښ رول لوبولو په مخه خپلي هڅي گړندۍ کړي دي. مسکو په مارچ مياشت کي د افغان حکومت او طالبانو د استازو ترمنځ يوې ورځنۍ غونډي کوربه وو.
د روسيې د بهرنيو چارو وزير سرگي لاوروف له «هندوستان ټايمز» ورځپاڼي سره په مرکه کي ويلي دي چي د افغانستان د سولي پروسې د پرمختگ په جريان کي مسکو تمه لري چي د امریکا متحده ايالاتو په گډون د سيمي د مهمو هيوادونو د متحد کېدو په موخه د «مسکو فارمټ» بيرته پيل کړي.
هغه وويل: «دغه ترکيب دا امکان برابروي چي له ملي روغي جوړي سره په پراخه سيمه ايزه کچه د مرستي چمتوالی همږی سي. لکه څرنگه چي د افغانستان د سولي پروسه پرمخ ځي، موږ پتېيلې ده چي دغه ميکانيزم بيا پرانيزو.»
لاوروف زياته کړه چي د افغانستان کړکېچ په حلولو کي هندوستان ډېر مهم رول لري او بايد د افغانستان د ملي پخلايني د پرمختگ له پاره په نړيوالو هڅو کي برخه واخلي.
د روسيې د بهرنيو چارو وزير سرگي لاوروف له هند څخه پاکستان ته سفر کوي.
دا په تيره نږدې يوه لسيزه کي پاکستان ته د روسيې د بهرنيو چارو د يوه وزير لومړی سفر دی.
د پاکستان د بهرنيو چارو وزير شاه محمود قريشي ويلي دي چي پاکستان ته د روسيې د بهرنيو چارو د وزير سفر د دواړو هيوادونو ترمنځ پر اړيکو باندي دلالت کوي.