په ليبيا کې سيلابونه؛ ۲۱زره کسان مړه او لادرکه دي
۱۴۰۲ شهریور ۲۵, شنبه
لیبياي چارواکو د شنبې په ورځ د اوبو دوو نړېدلو بندونو په هکله چې په نتېجه کې ېې له ۱۱زرو ډېر کسان مړه شوي، تحقیقات پیل کړي دي.
د ليبیا سور صلیب ادارې تر اوسه په دغو سيلابونو کې د ۱۱۳۰۰ کسانو مړينه تائيد کړې او د ژغورنې ټيمونه نن شنبه (د سپتمبر ۱۶مه) چې د سيلابونو شپږمه ورځ ده، په خټو او ويجاړو شوو سیمو کې د احتمالي بند پاتې شوو ژوندي کسانو او مړو د موندنې عملیات پر مخ وړي.
د لیبیا په شرق کې دغه سیلابونه د تېرې اوونۍ په پای کې د دانيل په نوم مدیترانه طوفان په نتیجه کې د درنو وروښتونو وروسته راووتل. دغو سيلابونو د اوبو دوه بندونه ونړول او د درنه (Derna) ښار مرکز پر لور ېې د څو مترو په ارتفاع اوبه برابرې کړې چې په نتیجه کې ېې ټولې ګاونډې سېمې وېجاړې او انسانان ېې سمندر ته وښکل.
د بې پولې داکترانو د عاجلې څانګې مشرې، کلایر نیکوليت (Claire Nicolet) اسوشتيد پریس ته وويل چې ژغورونکو د جمعې په ورځ «زښته ډېر مړي» وموندل او د نورو مړو د موندلو له پاره لټون لا هم ادامه لري. هغې زیاته کړه: «دا یو لوړ شمېر دی... له بده مرغه سمندر لا هم جسدونه مخته راوباسي.»
میرمن نيکولت زياته کړه چې لا ډېرو هڅو اړتیا ده، له هغې جملې د هغو افرادو له پاره د یو فوري رواني ملاتړ ضرورت دی کومو چې خپلې کورنۍ ېې له لاسه ورکړي دي. نوموړې وويل چې د لټون او ژغورني په برخه کې د ترسره شوو ټولو اقداماتو باوجود، د مړو د خښولو موضوع لا هم یوه د پام وړ ستونزه ده.
بل خوا چارواکو او مرستندويه ډلو له اوبو څخه د رامنځ ته کېدونکو ناروغيو له خپرېدو څخه اندېښنې ښودلي دي. دوی د شنبې په ورځ پر تلویزیون وویل چې په درنه کې لږ تر لږه ۱۵۰ کسان د ناپاکه اوبو د څښلو له کبله د اسهال په ناروغۍ اخته شوي دي. خلکو ته سپارښتنه شوې چې يوازې د بوتلونو اوبو څخه چې د مرستو په بهیر کې سیمې ته رسول شوي، استفاده وکړي.
د لیبیا لوی څارنوال، الصدیق الصور، وويل چې څارنوالان به د دوو نړيدلو بندونو په هکله چې په ۱۹۷۰ کال کې رغول شوي، تحقیقات پيل کړي. په تحقیقاتو کې به د بندونو د رغولو څرنګوالي او د هغو حفاظتي ضمانتونه په نظر کې نيول کيږي.
الصور وویل چې دغه څېړنې به په ښار کې له چارواکو او همدارنګه د دغو بندونو په جوړېدو کې د تېرو حکومتونو له چارواکو ترسره شي. هغه د جمعې په ورځ ناوخته په درنه ښار کې یوه خبري کنفرانس ته وويل: «زه ولس ته د دې ډاډ ورکوم چې هر چا په دې برخه کې ناغيړي کړې او یا د تېروتنې مرتکب شوی دی، څارنوالان به ېې طبعاً پر وړاندې جدی اقدامات کوي، په وړاندې به ېې جرمي دوسیه خلاصيږي او محکمې ته به معرفي کيږي.»
(AP)mks/mns