Во Појасот Газа влегува хуманитарна помош
21 октомври 2023
20 камиони на египетската Црвена полумесечина, натоварени главно со вода, лекови и медицински материјал, денеска (сабота) поминале низ граничниот премин Рафах, потврди новинар од новинската агенција АФП. Безбедносните кругови и претставници на египетската Црвена полумесечина го потврдија почетокот на испораката на помош.
Египетската државна телевизија прикажа неколку камиони кои минуваат низ граничниот премин во Рафах. Како што јави друг новинар на АФП, 36 празни камиони го минале граничниот премин од палестинската страна кон Египет, каде што требало да бидат натоварени со дополнителна помош. Колку долго ќе остане отворен граничниот премин Рафах за влез на хуманитарна помош, засега е нејасно. Тој се смета за единствен пат преку кој на населението во Газа може да му се достави итно потребната помош. На египетската страна пред преминот се наоѓаат 170 натоварени камиони, кои се во состојба на „стенд бај“, како што изјави портпаролката на Светската здравствена организација во Каиро.
Генералниот секретар на ОН Антонио Гутереш во петокот го посети граничниот премин Рафах, инсистирајќи на што побрз влез на камионите со хуманитарна помош. Два милиони луѓе во Појасот Газа трпат енормни страдања, зашто немаат вода, храна и лекови, рече тој: „Овие камиони ја прават разликата меѓу живот и смрт за толку многу луѓе во Појасот Газа."
Отворањето на границата за испорака на хуманитарна помош беше посредувано од американскиот претседател Џо Бајден. Израел, кој целосно го затвори Појасот Газа по големиот терористички напад на Хамас, се согласи првично да им биде дозволено на 20 камиони да влезат во Појасот Газа, но под услов помошта да се дистрибуира само до цивилите на југот на палестинската територија и не смее да падне во рацете на радикалниот исламистички Хамас, кој владее во Појасот Газа.
Хамас започна голем напад врз Израел на 7-ми октомври, при што беа убиени околу 1.400 луѓе и киднапирани околу 200 луѓе, кои се пренесени во Појасот Газа. Како одговор на нападот, Израел го блокираше Појасот Газа и изврши повеќекратни воздушни напади таму. Според палестинската организација Хамас, од почетокот на војната во областа се убиени околу 4.000 луѓе, а други 13.000 се повредени.