Бундестагот гласаше за зајакнување на ЕФСФ

Германскиот Бундестаг со широко мнозинство застана зад плановите на канцеларката Ангела Меркел за справување со должничката криза во еврозоната. 503 од вкупно 596 пратеници во германскиот парламент денеска гласаа за соодветната предлог- одлука на владата, кој меѓу другото предвидува проширување на Фондот за спас на еврото, ЕФСФ, за дополнителни стотици милијарди евра.

Со „не“ гласаа 89 парламентарци, а четворица се воздржаа од гласање. Откако претходно членовите на владината коалиција составена од партиите на Унијата (ЦДУ и ЦСУ) и Либералната партија усогласија заеднички предлог текст со припадници на опозициските партии на Социјалдемократите и на Зелените, беше очекувано предлогот да добие широко мнозинство. Пратениците на опозициската Партија на левицата уште претходно најавија дека решително се спротиставуваат на тоа.

Силен мандат за Меркел на Самитот на ЕУ

Во одлуката на Бундестагот меѓу другото се наведува дека со реформата на ЕФСФ отпаѓа неопходноста за продолжување на откупувањето на државни обврзници од презадолжените земји од еврозоната од страна на Европската централна банка. Од германската влада покрај тоа се бара ЕФСФ да не биде финансиран преку средства од Централната банка. Истотака владата треба да ги форсира настојувањата за воведување на данок за финансиски трансакции во рамките на ЕУ.

По оваа одлука на Бундестагот канцеларката Меркел заминува со силен мандат на еден од најважните Самитот во историјата на ЕУ . Таа добива поголем маневарски простор за одлучување на самитот во Брисел, на кој треба да биде донесена одлука за јакнење на реформираниот европски Фонд за спас на еврото. Од неа меѓутоа се бара да покаже лидерство во спорот околу најдобриот излез од должничката криза, кој и натаму тлее меѓу земјите членки.

Меркел денеска пред гласањето во Бундестагот апелираше за спас на еврото. Европа мора да излезе засилена од должничката криза, како стабилна унија, истакна канцеларката.

Меркел: Нема алтернатива за проширувањето на ЕСФС

Според Меркел зајакнувањето на Постојаниот фонд за спас на еврото ЕФСФ е без алтернатива.

„Ризикот од еден таков чекор е прифатлив. Многу повеќе неприфатливо и неодговорно би било да не се направи тој чекор. Подобра и поразумна алтернатива од проширувањето на ЕФСФ нема“, рече канцеларката пред Бундестагот.

Таа истакна дека постои историска одговорност да се бранат достигнувањата на Европа и тие да се заштитат, бидејќи она што е добро за Европа истотака е добро за Германија. Меркел уште еднаш апелираше: „ Ако пропадне еврото пропаѓа и Европа, а тоа не смее да се случи“.

Автор: Симе Недевски/ЖА/дпа/афп/ртр

Редактор: Жана Ацеска