Меркел: Сега или никогаш за спас на еврото
26 октомври 2011
Германската канцеларка Ангела Меркел пред почетокот на, за доцна попладне закажаниот вонреден самит на ЕУ апелираше за спас на еврото. Европа мора да излезе засилена од должничката криза, како стабилна унија, истакна Меркел во владината изјава пред пратениците во германскиот парламент.
Според Меркел зајакнувањето на постојаниот фонд за спас на еврото ЕФСФ е без алтернатива.
Она што е добро за Европа е добро и за Германија
„Ризикот од еден таков чекор е прифатлив. Многу повеќе неприфатливо и неодговорно би било да не се направи тој чекор. Подобра и поразумна алтернатива од проширувањето на ЕФСФ нема“, рече канцеларката пред Бундестагот.
Таа истакна дека постои историска одговорност да се бранат достигнувањата на Европа и тие да се заштитат, бидејќи она што е добро за Европа истотака е добро за Германија. Меркел повтори дека ако пропадне еврото пропаѓа и Европа, а тоа не смее да се случи.
„Фундаменталната слабост и дупките во конструкцијата на економската и монетарна унија или ќе се решаваат сега или јас велам ’никогаш’“, порача Меркел.
Пратеничките групи на владејачките партии, но и на опозиционите Социјалдемократи и Зелените најавија поддршка на предлогот на Меркел за да и‘ овозможат маневарски простор за одлучување на самитот на ЕУ во Брисел. На него треба да биде донесена одлука за јакнење на реформираниот европски Фонд за спас на еврото.
Автор:СН/АT/дпа/афп
Редактор: Александра Трајковска