Najeriya ta karbi allurar riga-kafin corona

Najeriya ta karbi allurar rigakafin cutar korona na kamfanin Moderna kusan miliyan hudu, an isar da rigakafin kasar a wannan Lahadin daga kasar Amirka, wakilan Majalisar Dinkin Duniya dana UNICEF ne suka karbi kayan rigakafin a madadin gwamnatin Najeriya a Abuja babban birnin tarayya.

Wannan na zuwa ne a daidai lokacin da kasar ke tunkarar na'uin Delta na cutar koronar da ke kokarin mayar da hannun agogo baya a yakin da kasar ke yi da cutar ta korona. Mutum sama da dubu biyu cutar ta halaka a Najeriya tun bayan bullarta a yayin da ta kama wasu sama da dubu dari da saba'in duk da cewa ana ganin alkaluman ka iya haura hakan.

Daga cikin al'ummar Najeriya miliyan dari biyu da goma, adadin wadanda aka yi wa allurar rigakafin cutar ba su taka kara sun karya ba a sakamakon karancin allurar da kasar ke fuskanta.