یوکرین لانگ رینج ہتھیاروں کے استعمال کا خواہاں

یوکرینی صدر وولودیمیر زیلنسکی نے جمعے کے روز کییف کے مغربی اتحادیوں پر زور دیا کہ وہ ماسکو کی ''ریڈ لائنوں‘‘ کو نظر انداز کر کے یوکرین کو روس کے اندر حملوں کے لیے طویل فاصلے تک مار کرنے والے ہتھیاروں کے استعمال کی اجازت دیں۔

جرمنی میں رامشٹائن فضائی اڈے پر امریکہ کی جانب سے منعقد کی گئی یوکرین کے حامیوں کی ایک میٹنگ کے دوران زیلنسکی کا کہنا تھا، ''ہمیں طویل فاصلے تک وار کرنے کی صلاحیت کی ضرورت ہے، نہ صرف یوکرین کے ان علاقوں کے لیے، جن پر روس کا قبضہ ہے بلکہ روسی علاقوں کے لیے بھی تاکہ روس پر امن کے قیام کے لیے زور دیا جا سکے۔‘‘

روس اور یوکرین کے درمیان جاری جنگ کو شروع ہوئے ڈھائی سال کا عرصہ گزر چکا ہے۔ اس تنازعے کے دوران حال ہی میں یوکرین کی فوج نے روسی علاقے کرسک میں کامیاب پیش قدمی کی تھی اور اب روسی فوج کی توجہ مشرقی یوکرین میں واقع شہر پوکروفسک پر قبضہ کرنے پر مرکوز ہے۔ یہ شہر کییف کی جنگی کوششوں کے حوالے سے اہم ہے۔ 

ڈھائی سو ملین ڈالر کی عسکری امداد

 آج کی میٹنگ میں امریکی وزیر دفاع لائیڈ آسٹن نے یوکرین کے لیے واشنگٹن کی جانب سے مزید ڈھائی سو ملین ڈالر کی عسکری امداد کا اعلان کیا۔ کرسک میں یوکرینی فوج کی پیش قدمی کا حوالہ دیتے ہوئے ان کا کہنا تھا کہ روس کو اب اپنے علاقوں میں دفاعی پوزیشن اختیار کرنا پڑ رہی ہے۔

روسی صدر ولادیمیر پوٹن کی ''بدنیتی‘‘ کا ذکر کرتے ہوئے آسٹن نے مزید کہا، ''ماسکو مشرقی یوکرین، بالخصوص پوکروفسک میں اپنی جارحیت جاری رکھے ہوئے ہے۔‘‘

آسٹن نے کہا، ''پوٹن کرسک میں اپنے فوجیوں کی پوزیشن تبدیل کر رہے ہیں، جب کہ یوکرین کے شہروں پر کریملن کی بمباری بھی جاری ہے اور وہ یوکرینی شہریوں کو نشانہ بھی بنا رہے ہیں۔‘‘

صدر زیلنسکی جرمن چانسلر اولاف شولس سے ملاقات کرنے کے بعد اٹلی روانہ ہو جائیں گے۔

زیلنسکی اس ماہ متوقع طور پر امریکہ کا دورہ بھی کریں گے، جہاں وہ اپنے امریکی ہم منصب جو بائیڈن کو ''فتح کا پلان‘‘ پیش کرنے کا ارادہ رکھتے ہیں۔

م ا ⁄ اا (روئٹرز، اے ایف پی)