یورو سے انخلاء پر یونین کے خلاف مقدمے کی یونانی دھمکی

برطانوی دارالحکومت لندن سے منگل تیس جون کو موصولہ جرمن نیوز ایجنسی ڈی پی اے کی رپورٹوں کے مطابق شدید مالیاتی بحران کے شکار ملک یونان کے وزیر خزانہ نے دھمکی دی ہے کہ اگر یورپی یونین کے یورو زون کے ملکوں پر مشتمل یورو گروپ نے یونان کو یورپی مالیاتی اتحاد سے نکالنے کا فیصلہ کیا تو ایتھنز اپنے حقوق کے تحفظ کے لیے تمام قانونی امکانات بروئے کار لائے گا۔

یونانی وزیر خزانہ یانِس واروفاکِس نے برطانوی اخبار ڈیلی ٹیلیگراف کے آن لائن ایڈیشن میں پیر کو رات گئے شائع ہونے والے اپنے ایک انٹرویو میں کہا، یورپی یونین کے معاہدوں میں یورو زون کے رکن کسی بھی ملک کے یورپی کرنسی اتحاد سے اخراج سے متعلق کوئی شق موجود ہی نہیں۔ ہم ایسے کسی بھی ممکنہ انخلاء کو تسلیم کرنے سے انکار کرتے ہیں۔‘‘

ڈیلی ٹیلیگراف کے مطابق یانِس واروفاکِس نے کہا کہ یورو زون میں یونان کی رکنیت ایک ایسا معاملہ ہے، جس پر کسی بھی طرح کی بات چیت ممکن نہیں۔

انہوں نے کہا، ’’یونان اس سلسلے میں قانونی ماہرین سے رائے لے رہا ہے اور اس بات پر بھی غور کرے گا کہ یورپی عدالت انصاف میں یورپی یونین کے خلاف فیصلے کے لیے درخواست دائر کر دی جائے۔‘‘ وزیر خزانہ کے بقول اس حوالے سے یونان اپنے ان جملہ قانونی حقوق کو استعمال میں لائے گا، جو اسے حاصل ہیں۔

یونان میں وزیر اعظم سِپراس کی حکومت موجودہ مالی بحران کے تناظر میں کل پیر انتیس جون کے دن سے ملک کے تمام تجارتی بینکوں اور ایتھنز میں سٹاک ایکسچینج کو ایک ہفتے کے لیے بند رکھنے کا اعلان کر چکی ہے۔ یونان کے لیے بین الاقوامی قرض دہندگان کی طرف سے مہیا کردہ بیل آؤٹ پیکج کی مدت آج منگل تیس جون کو پوری ہو رہی ہے۔

آج ہی منگل کا دن ختم ہونے تک ایتھنز حکومت کو بین الاقوامی مالیاتی فنڈ آئی ایم ایف کو 1.6 بلین یورو کی قرضوں کی ایک قسط لازمی طور پر واپس کرنا ہے۔ آئی ایم ایف کی سربراہ کرسٹین لاگارڈ نے کئی دن پہلے ہی کہہ دیا تھا کہ اگر یونان نے یہ قسط وقت پر ادا نہ کی تو اس کے لیے اپنے ذمے مالی ادائیگیوں کے قابل نہ رہنے کے باعث دیوالیہ پن سے بچنا انتہائی مشکل ہو جائے گا۔

دوسری طرف یونانی وزیر اعظم الیکسِس سِپراس نے ابھی کل پیر کے روز ہی کہا تھا کہ اگر یونان کا اسے قرض دینے والے اداروں کے ساتھ کوئی معاہدہ طے نہ پایا تو ایتھنز آئی ایم ایف کو آج تیس جون نصف شب تک کی مدت پوری ہونے تک 1.6 بلین یورو کی قرضوں کی قسط واپس نہیں کرے گا۔