گوگل: رواں برس کے اختتام تک متعدد شہروں کے تھری ڈی نقشے تیار

یہ بات کمپنی کے عہدیداروں نے بدھ کو سان فرانسِسکو میں واقع اپنے دفتر میں ہونے والی ایک پریس کانفرنس میں بتائی۔ گوگل رواں برس کے اختتام تک دنیا کے متعدد شہروں کے تھری ڈائمینشنل یا سہ جہتی نقشے جاری کرنے کا ارادہ رکھتی ہے۔

گوگل نے ان شہروں کے نام بتانے سے گریز کیا مگر اپنے اس منصوبے کا عملی مظاہرہ کرتے وقت اُس نے سان فرانسسکو کا ایک تھری ڈی (3D) نقشہ دکھایا جس میں کوئی صارف شہر کے فضائی منظر کو دیکھ سکتا ہے۔

گوگل ارتھ (Google Earth) کے ایک پراڈکٹ منیجر پیٹر بِرچ نے کہا: ’ہم ایک ایسا تصور قائم کرنے کی کوشش کر رہے ہیں جیسے آپ اپنے ذاتی ہیلی کاپٹر میں پرواز کر رہے ہوں۔‘

گوگل کے انجنئیرنگ شعبے کے سربراہ برائن میک کلینڈن نے بتایا کہ کمپنی ہوائی جہازوں کا ایک بیڑا استعمال کر رہی ہے جو کہ کنٹریکٹرز کی ملکیت ہیں اور وہ انہیں صرف گوگل کی خاطر اڑا رہے ہیں۔

رازداری کے مضمرات کے بارے میں کیے گئے ایک سوال کے جواب میں میک کلنڈن نے کہا کہ ایک طویل عرصے سے ہوائی جہازوں سے لی گئی 45 درجے زاویے کی تصاویر استعمال میں ہیں۔

گوگل کا کہنا ہے کہ رواں برس کے اختتام تک وہ متعدد شہروں کے تھری ڈی نقشے تیار کر لے گی جن کی مجموعی آبادی 300 ملین بنتی ہے۔ پہلا تھری ڈی شہری منظر نامہ (cityscape) تو چند ہی ہفتوں میں دستیاب ہو جائے گا۔

گوگل کئی برسوں سے کیمروں سے لیس گاڑیوں کو استعمال کر رہی ہے جو دنیا کے مختلف شہروں میں سڑکوں کے مناظر کی تصاویر کھینچتی رہتی ہیں۔ ان گاڑیوں کے استعمال نے بعض ملکوں میں رازداری کے خدشات پیدا کر دیے ہیں۔

سن 2010 میں گوگل نے اعتراف کیا تھا کہ سڑک کا منظر یا اسٹریٹ ویو لینے والی یہ گاڑیاں سہواﹰ لوگوں کے وائرلیس نیٹ ورکس سے ان کی ای میلز، پاس ورڈز اور دیگر ذاتی معلومات جمع کرتی رہی ہیں۔

عنقریب فراہم کیے جانے والے شہروں کے تھری ڈی نقشے گوگل ارتھ سافٹ ویئر اپلیکیشن کا حصہ ہوں گے۔ یہ اپلیکیشن ایسے موبائل فونز پر دستیاب ہو گی جو گوگل کا اینڈرائڈ اور ایپل کا آئی او ایس سافٹ ویئر استعمال کرتے ہیں۔

کمپنی نے اینڈرائڈ اسمارٹ فونز کے لیے گوگل میپس کے ایک ایسے ورژن کا بھی اعلان کیا جس سے صارفین انٹرنیٹ رابطے کے بغیر بھی بعض نقشوں تک رسائی حاصل کر سکتے ہیں۔

گوگل کی جانب سے یہ اعلان ایسے وقت کیا گیا ہے جب اس کی حریف کمپنی ایپل رواں برس کے اواخر میں اپنی آئی فون اور آئی پیڈ مصنوعات پر گوگل میپس کی جگہ نقشوں کی اپنی ٹیکنالوجی استعمال کرنے کا منصوبہ بنا رہی ہے۔

(hk/sks (Reuters