گولان کی پہاڑیوں سے فلپائن کے امن دستے بچ نکلنے میں کامیاب

فلپائن کے دارالحکومت منیلا سے وزارت دفاع کی جانب سے جاری ہونے والے ایک بیان میں بتایا گیا ہے کہ گولان کی پہاڑیوں پر تعینات اقوام متحدہ کے امن دستے میں شریک فلپائن کے فوجی بخیریت رات کی تاریکی میں بچ نکلنے میں کامیاب ہو گئے ہیں۔ اقوام متحدہ کے امن دستے میں 75 فلپائن کے فوجی شامل ہیں۔ فلپائن کی فوج کے ترجمان لیفٹیننٹ کرنل رامون زاگالا کے مطابق تمام فوجی بچ نکلنے میں کامیاب رہے اور وہ بخیریت ہیں۔ ترجمان کے مطابق تمام فوجی پوزیشنوں سے دستبردار ضرور ہوئے لیکن اپنے ہتھیار اپنے ساتھ لانے میں کامیاب رہے ہیں۔

محاصرے سے نکلنے والے ابتدائی 35 فوجیوں کو اقوام متحدہ کی بکتر بند گاڑیوں کے ذریعے برائیقہ کی فوجی پوزیشن سے نکالا گیا تھا۔ اِس کارروائی میں آئر لینڈ کے فوجی بھی شامل تھے۔ اِن کو نکال کر فوری طور پر محفوظ مقام پر منتقل کیا گیا تھا۔ بقیہ 40 فوجیوں نے جہادیوں کو سات گھنٹے تک جاری رہنے والی جھڑپوں میں مصروف رکھا۔ بعد میں یہ اندھیرا پھیلنے پر دو کلو میٹر کی دوری پر واقع اقوام متحدہ کی ایک اور پوزیشن تک پہنچنے میں کامیاب ہو گئے۔

اقوام متحدہ کی جانب سے ہفتے کی شام جاری ہونے والے بیان میں کہا گیا کہ گولان علاقے میں بظاہر حالات پرسکون ہیں لیکن تناؤ کی کیفیت موجود ہے۔ گولان کی پہاڑیوں میں اقوام متحدہ کے امن دستے شام اور اسرائیل کے درمیان سرحدی معاملات کی نگرانی کے لیے تعینات ہیں۔ اِس دستے کے اراکین کو النصرہ فرنٹ کے جہادیوں نے چار روز قبل بدھ کو القنیطرہ قصبے کی کراسنگ کو عبور کر کے محاصرے میں لے لیا تھا۔ محاصرے کے عمل کے دوران امن دستے میں شامل فجی کے 44 فوجیوں کو جہادیوں نے حراست میں لے لیا۔

النصرہ کے جہادیوں نے بدھ کی شام اور اسرائیل کی سرحد پر واقع امن دستوں کے دوسرے مقامات رویحانا اور برائیقہ کا بھی محاصرہ کیا تھا۔ رویحانا کا مقام القنیطرہ سے سوا دو کلو میٹر کے فاصلے پر ہے۔ امن دستے کے فلپائن کے اراکین کو بھی النصرہ فرنٹ کے باغی ہتھیار پھینک دینے کا کہتے رہے۔ سیریئن آبزرویٹری برائے ہیومن رائٹس کے رامی عبدالرحمان نے جہادیوں کا تعلق النصرہ سے بتایا ہے۔ عبدالرحمان نے یہ بھی بتایا کہ ہفتے کے روز فلپائن کے امن دستے اور جہادیوں کے درمیان وقفے وقفے سے فائرنگ کا تبادلہ جاری رہا۔

دنیا بھر میں جہادی گروپوں کے بارے میں خفیہ طور پر معلومات جمع کرنے والی ویب سائٹ SITE کے مطابق فجی کے مغوی فوجیوں کی ایک تصویر انٹرنیٹ پر جاری کی گئی ہے۔ یہ فوجی اپنی وردی میں ملبوس ہیں۔ ان تمام کے شناختی کارڈز بھی دیکھے جا سکتے ہیں۔ ویب سائٹ SITE کے مطابق النصرہ نے امن دستے کے اراکین کو اغوا کرنے کی وجہ بیان کرتے ہوئے بیان کیا کہ اقوام متحدہ دنیا بھر میں مسلمانوں کے خون بہائے جانے کے خلاف فوری طور پر بھرپور کارروائی کرنے سے قاصر ہے۔ اِس ویب سائٹ پر جاری ہونے والی رپورٹ کی آزاد ذرائع سے تصدیق ممکن نہیں ہے۔

گولان کی پہاڑیوں میں اقوام متحدہ کے امن دستے میں شامل فوجیوں کی تعداد 1223 ہے۔ ان میں شامل فوجیوں کا تعلق نیپال، فِجی، آئرلینڈ، بھارت، ہالینڈ اور فلپائن سے ہے۔ اقوام متحدہ کے سیکرٹری جنرل بان کی مون نے مغوی فوجیوں کی غیر مشروط اور فوری رہائی کا مطالبہ کیا ہے۔