گوادر سے کاشغر تک تجارتی شاہراہ کی تعمیر کا معاہدہ

پاکستانی وزیر اعظم نواز شریف نے اپنے چینی ہم منصب لی کی چیانگ کے ساتھ بیجنگ میں جمعے کے روز ملاقات کی تھی۔ چین اور پاکستان کے درمیان جن آٹھ معاہدوں پر دستخط کیے گئے ہیں، ان میں دونوں ملکوں کے درمیان اقتصادی کوریڈور کے قیام کو بہت زیادہ وقعت دی گئی ہے۔ یہ معاہدات پاکستان اور چین کے وزرائے اعظم کی ملاقات کے درمیان طے پائے۔ پاکستانی مبصرین کے نزدیک گوادر سے کاشغر تک تجارتی شاہراہ کی تعمیر خاص اہمیت کا معاہدہ ہے۔ مالی مشکلات سے دوچار پاکستان کو امید ہے کہ چین کی جانب سے پاکستان میں سرمایہ کاری کے کئی نئے مواقع پیدا کیے جائیں گے۔

بحیرہ عرب کے ساتھ براہ راست رابطہ استوار کرنے کے لیے چین اپنے صوبے سنکیانگ کے شہر کاشغر سے لے کر پاکستان کے ساحلی شر گواردر تک جو تجارتی سڑک تعمیر کرنا چاہتا ہے، وہ تقریباً دو ہزار کلو میٹر لمبی ہو گی اور یہ سنگلاخ پہاڑوں، بے آب و گیاہ میدانی علاقوں سے گزرتی ہوئی گوادر پہنچے گی۔ اس تجارتی شاہراہ کی تعمیر کو ایک طویل المدتی پلان کے طور پر لیا گیا ہے۔ ابتداء میں یہ رابطہ سڑک کے ذریعے ہو گا اور بعد میں ریل کی پٹری بچھانے کو بھی تجویز کیا گیا ہے۔ رواں برس فروری میں گوادر کی بندرگاہ کا انتظام ایک مفاہمت کے تحت پہلے ہی چینی کمپنی کے حوالے کیا جا چکا ہے۔

آٹھ معاہدوں میں سے ایک اور چینی سرحد سے راولپنڈی تک فائبر آپٹک کیبل کو نصب کرنا بھی ہے تا کہ پاکستان کے انٹرنیشنل کمیونیکیشن نیٹ ورک کو تقویت حاصل ہو سکے۔ اس پراجیکٹ پر پچاسی فیصد خرچہ چین کی حکومت برداشت کرے گی اور بقیہ پندرہ فیصد اسلام آباد حکومت ادا کرے گی۔ یہ پراجیکٹ تین سال میں مکمل ہو گا اور اس پر کل 44 ملین ڈالر کی لاگت آئے گی۔ پاکستان اور چین اپنے تجارتی روابط کو مزید مستحکم بھی کرنے کا ارادہ رکھتے ہیں۔ گزشتہ برس پہلی مرتبہ پاک چین تجارت کا حجم بارہ ارب ڈالر تک پہنچا تھا۔

دوسری جانب پاکستان کی حکومت سے چین یہ توقع رکھتا ہے کہ وہ سنکیانگ سے تعلق رکھنے والے ایغور عسکریت پسندوں کے خلاف بھرپور کریک ڈاؤن کرے گی۔ سنکیانگ کے ایغور مسلمان علیحدگی پسندوں کے حوالے سے چین کا بارہا کہنا ہے کہ یہ پاکستان میں القاعدہ سے وابستہ انتہا پسندوں کے پاس پناہ لینے پہنچتے ہیں۔ پاکستان کا موقف ہے کہ کئی ایغور انتہا پسندوں کو قبائلی علاقوں میں یا تو ہلاک کر دیا گیا ہے یا جو باقی بچے ہیں ان کہ بیدخل کیا جا چکا ہے۔ اسلام آباد حکومت یہ تسلیم کرتی ہے کہ ابھی بھی کچھ ایغور علیحدگی پسند قبائلی علاقوں میں پناہ لیے ہوئے ہیں۔