’گو کورونا گو‘

دنیا بھر میں کورونا وائرس سے متاثرہ افراد کی تعداد میں مسلسل اضافہ دیکھا جا رہا ہے۔ اس وائرس کے وبائی صورت اختیار کرنے کے خوف سے متعدد ممالک کے عوام ضروری اشیاء اور ادویات ذخیرہ کر رہے ہیں۔ کووِڈ انیس نامی بیماری سے محفوظ رہنے کے حوالے سے مختلف احتیاطی تدابیر بھی عام کی جا رہی ہیں جس میں ہاتھوں کو اچھی طرح دھونے، جراثیم کش اشیاء اور ماسک کا استعمال نمایاں طور پر نظر آتا ہے۔

ویتنام میں کورونا وائرس سے محفوظ رہنے کے حوالے سے آگہی فراہم کرنے کے لیے موسیقی کا استعمال کرتے ہوئے ایک گانا تیار کیا گیا ہے۔  اس گانے کے بول 'گیہں کو وی‘ یعنی 'گو کورونا گو‘ ہیں۔ ویتنامی گلوکار ایرک اور مِن کے 'واشنگ ہینڈ سانگ‘ کو یوٹیوب پر گزشتہ روز تک سینتالیس لاکھ افراد دیکھ چکے ہیں۔

اس گانے کے بول خاک ہنگ نے لکھے ہیں اور یہ ویتنام کی وزارت صحت کے تعاون سے تیار گیا ہے تاکہ تفریح کے ساتھ ساتھ عوام کو اس وائرس کے پھیلاؤ سے محفوظ رہنے کی ضروری ہدایات بھی فراہم کی جا سکیں۔ اس گانے کی ویڈیو اینیمیشن کے ساتھ تیار کی گئی ہے، جس میں ہاتھوں کو رگڑ رگڑ کر دھونے اور کورونا کو بھگانے کے طریقے گرافکس کی شکل میں دکھائے گئے ہیں۔

ویتنامی گلوکار ایرک اس گانے کو انگریزی زبان میں ریلیز کرنا چاہتے ہیں۔ ایرک کے بقول، ''انگریزی گانے کی ریکارڈنگ مکمل ہو چکی ہے، چند روز میں ویڈیو شائع کی جائے گی۔‘‘

یوٹیوب پر ایک صارف اس گانے پر کامنٹ کرتے لکھا، ''اگر کورونا وائرس یہ گانا سن لے، وہ خود ہی بھاگ جائے گا‘‘۔

ٹِک ٹاک پر اس گانے کے بول پر 'ڈانسنگ اسٹیپس‘ کا چیلنج شروع ہو گیا ہے، جس میں رقص کرتے ہوئے ہاتھ دھونے کے طریقے بتائے جا رہے ہیں۔

معروف امریکی ٹی وی پروگرام 'لاسٹ ویک ٹونائٹ‘ کے میزبان جان اولیور نے اس ویڈیو کو پروگرام میں دکھا کر اس گانے کی شہرت میں مزید اضافہ کر دیا۔

 ع آ / ع ق (نیوز ایجنسیاں)