کرک میں عورتوں کے محرم کے بغیر بازار جانے پر پابندی

پولیس نے ہفتے کو اس بات کی تصدیق کی ہے کہ خیبر پختونخواہ کے علاقے کرک میں مولویوں نے اس پابندی کا اعلان کیا ہے۔ انہوں نے اس فیصلے میں کہا ہے کہ خواتین محرم کے بغیر بازار نہ جائیں۔

کرک کی مقامی مساجد کے کم از کم چار مولویوں نے جمعے کو ایک ملاقات کے بعد یہ فیصلہ کیا۔ خبر رساں ادارے ڈی پی اے کے مطابق اسی روز مساجد سے لاؤڈ اسپکروں کے ذریعے اس پابندی کا اعلان بھی کر دیا گیا۔ تاہم پولیس نے اس کی تصدیق ہفتے کو کی ہے۔

فوری طور پر یہ واضح نہیں ہو سکا کہ آیا اس فیصلے کے پیچھے طالبان شدت پسندوں کا ہاتھ ہے یا نہیں۔

ایک پولیس اہلکار کا کہنا ہے کہ اس پابندی کا فیصلہ کرنے والے مولویوں نے مقامی پولیس اہلکاروں سے بھی ملاقات کی اور پابندی کے نفاذ کے لیے ان سے مدد مانگی۔ انہوں نے مزید بتایا: ’’حکام نے اس پر عمل کرنے سے انکار کر دیا کیونکہ کسی کو بھی خریداری پر جانے سے روکنا قانون کے خلاف ہے۔‘‘

اس کے برعکس ضلعی پولیس اہلکار فضل حنیف نے خبر رساں ادارے روئٹرز کو بتایا کہ پولیس اس پابندی کی حمایت کر رہی ہے۔ اس پابندی کے مطابق محرم کے بغیر بازار جانے والی خواتین کو گرفتار کر لیا جائے گا جبکہ انہیں اشیا فروخت کرنے والے دکانداروں کو بھی سزا دی جائے گی۔

مقامی تاجر منور خان نے روئٹرز کو بتایا کہ کاروباری حلقہ اس پابندی کی مخالفت کر رہا ہے۔

ڈی پی اے کے مطابق اس پابندی کا اعلان کرنے والی کمیٹی کے ایک رکن مولانا میر زقیم نے پاکستان کے انگریزی روزنامہ ڈان کو بتایا: ’’یہ فیصلہ اس لیے کیا گیا کیونکہ بیشتر تنہا عورتیں فحاشی کا باعث بن رہی ہے، بالخصوص رمضان کے مقدس مہینے میں۔‘‘

ان کا کہنا ہے کہ ابتدائی طور پر یہ پابندی کرک میں نافذ کی جائے گی جو قبائلی علاقے اورکزئی کے قریب واقع ہے۔ اورکزئی میں طالبان سرگرم ہیں۔

خواتین کے حقوق کے لیے کام کرنے والی ایک غیر سرکاری تنظیم عورت فاؤنڈیشن کی ریذیڈینٹ ڈائریکٹر شبینہ فراز کا کہنا ہے کہ یہ فیصلہ بنیادی انسانی حقوق کی خلاف ورزی ہے۔ ان کا کہنا ہے: ’’چند لوگ اس بات کا فیصلہ نہیں کر سکتے ہیں کہ پاکستان کی خواتین ، جو 180ملین آبادی کا نصف ہیں، کو اپنی زندگیاں کس طرح گزارنی ہے۔‘‘