کراچی کے سیاسی ماحول میں شدید تناؤ

پاکستان تحریک انصاف کے ڈاکٹر علوی کا کہنا ہے کہ قومی اسمبلی کے حلقے این اے دو سو پچاس میں دوبارہ پولنگ نے واضح کردیا ہے کہ اگر گیارہ مئی کے انتخابات میں قانون نافذ کرنے والے ادارے خصوصاً فوج سکیورٹی فراہم کرتی تو شہر کی صورتحال مختلف ہوتی۔

این اے دو سو پچاس میں نیا موڑ اس وقت آیا جب انتخابات سے ایک روز قبل تحریک انصاف کی خاتون رہنما زہرہ شاھد کو اسی حقلہ میں ا ن کے گھر کے باہر گولیاں مار کرقتل کردیا گیا۔ تحریک انصاف کے سربراہ عمران خان نے اس قتل کی ذمہ داری ایم کیو ایم کے قائد الطاف حسین پر عائد کی۔ الزام عائد کیے جانے کے چند گھنٹوں بعد ایم کیو ایم کے قائد الطاف حسین نے لندن سے خطاب اور اپنی ہی جماعت کی کراچی میں موجود قیادت پر برس پڑے۔ اس پر کارکنان میں کراچی قیادت کے خلاف اشتعال دیکھا گیا اور یہیں سے پی ٹٰی آئی اور ایم کیو ایم کے درمیان بھرپور کشیدگی کا آغاز ہو گیا۔

ایم کیو ایم اور پی ٹی آئی کے درمیان کشیدگی کے اثرات اور تحریک انصاف کی جانب سے کراچی میں نشستیں حاصل کرنے کے حوالے سے سینئر صحافی اور تجزیہ کار مظہر عباس نے ڈویچے ویلے سے گفتگو کرتے ہوئے کہا کہ پی ٹی آئی نے کراچی میں توقع کے برخلاف ووٹ حاصل کیے ہیں جبکہ تحریک انصاف کا کراچی میں تنظیمی ڈھانچہ اس قدر مستحکم نہیں تھا۔ ان کا کہنا ہے کہ بات صرف نشستوں کے حصول کی نہیں بلکہ جس طرح اور جس تعداد میں پی ٹی آئی نے ووٹ حاصل کیے ہیں وہ ایم کیوایم، جماعت اسلامی اور پیپلز پارٹی سمیت سب کے لیے لمحہ فکریہ ہیں۔
مظہر عباس نے مشورہ دیا کہ ایم کیو ایم کو شہر کے وسیع تر مفاد میں نتائج کو تسلیم کرنا چاہیے تاکہ کراچی میں سیاسی کلچر مضبوط ہوسکے۔

ایکسپریس ٹربیون سے وابسطہ صحافی فراح ناز زاہدی کے مطابق انتخابات کے بعد سیاسی جماعتوں کو اپنی غلطیوں کی خود نشاندہی کرکے انہیں درست کرنا ہوگا۔ کراچی کے لوگ اب پرتشدد سیاست سے تنگ آ چکے ہیں۔ لہذا تحریک انصاف کی صورت میں انہیں دیگر جماعتوں کا متبادل نظر آرہا ہے۔
سیاسی مبصرین کہتے ہیں کہ پرامن تبدیلی کی بات صرف تحریک انصاف کررہی ہے ۔ وہ ایم کو ایم کو قبول نہیں ہے۔ ان حلقوں کا کہنا ہے کہ ایم کیو ایم میں موجود داخلہ انتشار اس وقت سامنے آیا جب عمران خان نے الطاف حسین پر قتل الزام عائد کیا۔ یہی وجہ ایم کیو ایم کے قائد کی ناراضگی کے بعد رابطہ کمیٹی کے اراکین نے معافی مانگی اور آج کراچی سمیت ملک بھر میں عمران خان کے خلاف ایم کیو ایم کی جانب سے احتجاجی مظاہرے کیے گئے۔ ان میں مظاہرین نے عمران خان سے معافی کا مطالبہ کیا ہے۔۔

ایم کیو ایم رابطہ کمیٹی کے رکن وسیم آفتاب نے مظاہرین سے خطاب کرتے ہوئے عمران خان اور تحریک انصاف کو آڑے ہاتھوں لیا۔ وسیم آفتاب نے عمران خان کو تہذیب سے گرا ہوا شخص اور تحریک انصاف کو تہذیب سے گری ہوئی جماعت قرار دیا۔ ان کا کہنا تھا کہ عمران خان نے نیا پاکستان بنانے کا نعرہ دے کر قوم کو بے وقوف بنایا ہے۔
دوسرے جانب تحریک انصاف عمران خان کے موقف کی بھر پور تائید کرتی نظر آرہی ہے اور ان کی ہدایت کے مطابق آج کراچی میں مزار قائد کے سامنے مظاہرہ کیا گیا ہے۔ اس دوران نہ صرف پاکستانی بلکہ برطانوی حکومت سے بھی مطالبہ کیا گیا ہے کہ وہ اپنی شہری کی پاکستان میں اشتعال انگیزی اور دہشت گردی کا نوٹس لیں۔
سیاسی مبصرین کا کہنا ہے کہ ایم کیو ایم اور تحریک انصاف کے درمیان کراچی میں شروع ہونے والی انتخابی ٹسل تیزی سے اس جانب گامزن ہے جہاں دونوں جماعتوں کے کارکنان کے ہاتھ ایک دوسرے کے گریبانوں میں ہونگے۔ اور اگر ایسا ہوا تو سیاسی دباؤ کا شکار قانون نافذ کرنے والے تباہ حال ادارے اس صورت حال کوکنٹرول کرنے کے قابل نہیں ہیں۔

رپورٹ: رفعت سعید کراچی

ادارت : عدنان اسحاق