کراچی میں حالات معمول پر آتے ہوئے

صوبہ سندھ کے دارالحکومت کراچی میں سیاسی اور لسانی تناؤ کے نتیجے میں ٹارگٹ کلنگ کے پانچ روز تک جاری رہنے والے واقعات میں کم ازکم نوے افراد ہلاک اور ایک سو سے زائد زخمی ہو گئے تھے۔ جرمن خبر ایجنسی DPA نے اپنی رپورٹوں میں بتایا ہے کہ کراچی میں پولیس کے سربراہ سعود مرزا کے مطابق آج اتوار سے پاکستان کے اس بندرگاہی شہر میں صورتحال کافی بہتر ہونے لگی ہے۔ سعود مرزا کے مطابق کراچی میں مقامی مارکیٹیں دوبارہ کھل گئی ہیں اور پبلک ٹرانسپورٹ کا نظام بھی معمول کے مطابق کام کر رہا ہے۔

سعود مرزا نے بتایا کہ کراچی کے زیادہ تر متاثرہ علاقوں میں پولیس اور نیم فوجی دستوں نے کنٹرول سنبھال لیا ہے۔ اس کے علاوہ حالیہ خونریزی کے ذمہ دار افراد کی گرفتاری کے لیے تلاشیاں بھی لی جا رہی ہیں۔ کراچی سے موصولہ رپورٹوں کے مطابق حکام نے بتایا کہ ٹارگٹ کلنگ کے کئی روزہ واقعات کے دوران شہر کے چند علاقوں میں پانی اور بجلی کی فراہمی کا نظام بھی معطل ہو گیا تھا تاہم شہری انتظامیہ ان بنیادی سہولتوں کی بحالی کی پوری کوششیں کررہی ہے۔

کراچی میں ٹارگٹ کلنگ کے حالیہ واقعات کا آغاز گزشتہ منگل کے روز اس وقت ہوا تھا،جب شہر میں پشتون آبادی کے ایک رہنما کو قتل کر دیا گیا تھا۔ بتایا جاتا ہے کہ اس کے بعد ایم کیو ایم اور پشتو بولنے والی آبادی کے مسلح کارکنوں کے درمیان سڑکوں پر تصادم شروع ہو گیا تھا، جس دوران فریقین نے ایک دوسرے پر حملے بھی کیے۔ ان واقعات میں خود کار رائفلیں دستی بم اور راکٹ بھی استعمال کیے گئے جبکہ درجنوں دکانوں گھروں اور گاڑیوں کو آگ بھی لگا دی گئی۔ کراچی شہر کی موجودہ آبادی کا اندازہ اٹھارہ ملین لگایا جاتا ہے۔

صوبہ سندھ کی وزارت داخلہ کے ایک ترجمان نے اتوار کو بتایا کہ شہر میں گزشتہ منگل سے لے کر کل ہفتے کی رات تک کم ازکم پچانوے افراد ہلاک اور ایک سو ستر زخمی ہو چکےتھے۔ کراچی میں متحدہ قومی موومنٹ اور پشتو زبان بولنے والے افراد کی نمائندہ سیاسی جماعت کے درمیان لسانی پس منظر والی مخالفت کی اصل وجہ اپنے لیے سیاسی اثر و رسوخ کی دوڑ ہے۔ کراچی میں قریب تین عشروں سے جاری ایم کیو ایم اورعوامی نیشنل پارٹی کی طرف سے ایک دوسرے سے مخالفت کی اس جنگ میں اب تک سینکڑوں جانیں ضائع ہو چکی ہیں۔

کراچی کے بہت سے شہریوں کی رائے یہ ہے کہ کئی روزہ خونریزی میں اتنی زیادہ ہلاکتوں کے بعد حکومت نے حالات کو پرامن بنانے کے لیے اضافی سکیورٹی دستوں کی تعیناتی کے ساتھ جو اقدامات کیے، وہ بہت پہلے کیے جانے چاہیے تھے۔ بہت سے شہریوں نے قانون کی بالا دستی کے لیے حکومت کی مبینہ طور پر دیر سے کی جانے والی مداخلت کو انتظامیہ کی ناکامی قرار دیا ہے۔

رپورٹ: عصمت جبیں

ادارت: عاطف بلوچ