کراچی حملہ، صوبائی پولیس سربراہ تبدیل

خبر رساں ادارے اے ایف پی نے حکام کے حوالے سے بتایا ہے کہ کراچی کے عباس ٹاؤن میں ہوئے خود کش کار بم حملے کے بعد سپریم کورٹ نے حکومتی مشینری کو سخت تنقید کا نشانہ بنایا ہے۔ دس جنوری کے بعد سے پاکستان میں آباد شیعہ اقلیت پر یہ چوتھا بڑا حملہ تھا۔ رواں برس کے آغاز سے شروع ہونے والی تشدد کی اس تازہ لہر کے نتیجے میں کم ازکم ڈھائی سو افراد لقمہء اجل بن چکے ہیں۔

کالعدم سنی جنگجو تنظیم لشکر جھنگوی پہلے تین حملوں کی ذمہ داری قبول کر چکی ہے۔ ایسے حملوں کے بعد پاکستان بھر میں وسیع پیمانے پر غم و غصہ دیکھا جاتا ہے کہ حکومتی مشینری اس طرح کے فرقہ وارانہ حملوں کو روکنے میں کیوں ناکام ہے۔

سندھ کی صوبائی حکومت کے وکیل انور منصور خان نے بدھ کے دن سپریم کورٹ کو بتایا ہے کہ پولیس چیف فیاض لغاری کو ان کے نائب افسران سمیت ان کے عہدوں سے ہٹا دیا گیا ہے۔ کراچی میں سکیورٹی فورسز کی طرف سے ایک شہری کو ایک پارک میں ہلاک کر دیے جانے کے واقعے کے بعد بھی لغاری کو جون 2011ء میں ان کو اس عہدے سے ہٹا دیا گیا تھا تاہم بعدازاں وہ دوبارہ پولیس چیف کے عہدے پر بحال کر دیے گئے تھے۔

سپریم کورٹ کی طرف سے انکوائری رپورٹ طلب

کراچی میں ہوئی سپریم کورٹ کی ایک سماعت کے دوران انور منصور خان نے مزید کہا کہ متعدد جونیئر پولیس افسران کو بھی معطل کیا گیا ہے اور انکوائری شروع کر دی گئی ہے۔ ان کے بقول اس انکوائری کے نتائج سے معلوم ہو گا کہ آیا انہوں نے اپنی ذمہ داریوں سے غفلت برتی ہے یا نہیں۔

سپریم کورٹ نے ملک کے تین خفیہ اداروں آئی ایس آئی، ملٹری انٹیلیجنس اور انٹیلی جنس بیورو کو جمعے تک مکمل رپورٹ جمع کرانے کی ہدایت کی ہے۔ سپریم کورٹ کے چیف جسٹس افتخار محمد چوہدری نے کراچی حملے پر حکومت اور سکیورٹی اداروں کی مبینہ غلفت کو شدید تنقید کا نشانہ بنایا ہے۔

چیف جسٹس افتخار محمد چوہدری نے مزید کہا ہے کہ کسی کو بھی یہ اجازت نہیں دی جائے گی کہ وہ پبلک آفس میں تو بیٹھے لیکن لوگوں کی جانی و مالی حفاظت کے لیے مناسب اقدامات نہ اٹھائے۔ انہوں نے کہا:’’وہ لوگ جو اس دھماکے میں ہلاک ہوئے ہیں یا جو مسلسل دہشت گردی کا نشانہ بن رہے ہیں، وہ کوئی غیر ملکی نہیں ہیں۔ وہ ہمارا اپنا خون ہیں۔ یہی لوگ اپنے ٹیکسوں سے ہماری تنخواہوں کے لیے رقوم ادا کرتے ہیں۔‘‘

(ab/aa(AP