کراچی : ایم کیو ایم اور الطاف حسین

اب جب کہ الطاف حسین کے خلاف برطانیہ میں قائم تحقیقات کی خبریں سامنے آگئی ہیں یہ سوال کہ اگر برطانوی پولیس الطاف حسین کو قتل، کالا دھن سفید کرنا اور دوسرے الزامات میں گرفتار کرلیتی ہے تو کیا کراچی میں ایک بار پھر پر تشدد ہڑتالوں کا سلسلہ شروع ہوجائے گا بہت اہم ہو گیا ہے۔

متحدہ قومی موومنٹ کے رہنما ڈاکٹر فاروق ستار کہتے ہیں کہ ایسی صورت میں پارٹی کا جواب قاعدے قانون کے اندر ہی ہوگا۔ لیکن الطاف حسین کی جانب سے پارٹی قیادت سے دستبرداری کے حالیہ اعلان پر کارکنوں کا شدید ردعمل اس بات کا غماز ہے کہ الطاف حسین کی گرفتاری لندن میں کوئی بڑی تبدیلی کا عکاس ہو نا ہو لیکن کراچی میں کوئی نئی تاریخ ضرور رقم کرے گی۔

ایم کیو ایم کی پرانی حلیف پاکستان پیپلز پارٹی کا بھی یہی کہنا ہے کہ کراچی کے حالات خراب کرکے شائد متحدہ کچھ حاصل نہیں کرپائے۔ منظور وسان کہتے ہیں کہ اسکاٹ لینڈ یارڈ اور لندن پولیس پر کسی کا اثر و رسوخ نہیں چلتا لکین الطاف حسین کے ساتھ انصاف ہونا چاھئے۔ ایم کیوایم کی جانب سے الطاف حسین کے چار گھنٹے خطاب کے بعد کراچی میں برطانوی ڈپٹی ہائی کمیشن کے باہر احتجاج مظاہرہ بھی کیا گیا اور یاداشت بھی پیش کی گئی مگر برطانوی ہائی کمیشن اس احتجاج کو اچھی نظر سے نہیں دیکھا۔ اتوار کو کراچی میں ہائی کمیشن کے دفتر کے سامنے احتجاج پر ہائی کیشمن کے ترجمان نے نہ صرف ناراضگی کا اظہار کیا ہے بلکہ اس احتجاج کو برطانوی قانون نافذ کرنے والے اداروں کے کام میں مداخلت سے تعبیر کیا ہے۔

خیر یہ تو برطانیہ اور اسکے شہری کے آپس کا معاملہ ہے لیکن تجزیہ کار اورعسکری ماہرین بھی الطاف حسین کی ممکلنہ گرفتاری کو کراچی میں کسی بڑی پر تشدد لہر کا موجب قرار دے رہے ہیں۔

سابق کور کمانڈر کراچی جنرل ریٹائیرڈ امتیاز شاھین کا ڈوئچے ویلے سے گفتگو کرتے ہوئے کہنا تھا کہ کراچی میںٕ لوگ خوف کی وجہ سے اس حوالے سے بات نہیں کرتے مگر الطاف حسین برطانوی شہری ہیں اور وہاں کے قانون کے مطابق میٹروپولینٹن پولیس کاروائی کررہی ہے۔  لہذا اس کاروائی کو جواز بناکر کراچی میں لاقانونیت اور دہشت گردی پھیلانا درست نہیں ہے۔ انہوں نے مزید کہا کہ اگر الطاف حسین کو عمران فاروق قتل کے الزام میں گرفتار کیا گیا تو ایم کیو ایم داخلی انتشار کی وجہ سے دھڑوں میں تقسیم ہوجائے گی۔ تاہم ایم کیو ایم کے پاس ایسے لوگوں کی فورس موجود ہے جو شہر کو مفلوج کرسکتے ہیں۔

اسی حوالے سے تازہ ترین پیشرفت یہ ہے کہ سندھ پولیس کے سربراہ شاھد ندیم بلوچ نے سیکورٹی اداروں کو ایک مراسلہ کے ذریعے آگاہ کیا ہے کہ کراچی میں ممکنہ طور پر بڑی دہشت گردی کا خطرہ ہے لہذا پولیس چوکس رہے۔

گو کے حکومت سندھ الطاف حسین کی گرفتاری کو کراچی میں کسی بڑی بدامنی کا سبب نہیں سمجھتے لیکن اسکے باوجود محکمہ داخلہ سندھ کے مشیر شرف الدین میمن کہتے ہیں کہ انہوں نے کسی بھی صورت حال سے نمٹنے کے لیے تمام تر اقدامات کرلیے ہیں اور اس حوالے سے اہم شخصیات کو خصوصی سیکورٹی بھی فراہم کردی گئی ہے۔ 

انتخابات میں ایم کیو ایم کی کارکردگی توقع کے برخلاف رہی اور اس کے بعد ایسا کوئی احتجاج کراچی والوں میں بھی بہت مقبول نہیں نظر آرہا۔ اپنے قیام سے اب تک متحدہ قومی موومنٹ شائد پہلی مرتبہ ایک ایسی صورتحال میں ہے کہ اگر وہ ہڑتال کا اعلان کرتی ہے تو نہ صرف اس کا کوئی فائدہ نہیں ہوگا بلکہ شائد نقصان ہی ہوجائے۔