’کراچی افیئر‘ سارکوزی کے ساتھی پر فرد جرم عائد

یہ مقدمہ ’کراچی افیئر‘ کے نام سے مشہور ان پیچیدہ تحقیقات کا حصہ ہے، جس میں فرانس اور پاکستان کے مابین ایک اسلحہ ڈیل بھی آتی ہے، جس کے تحت مبینہ طور پر ناجائز خفیہ رقوم کے انتظام کا منصوبہ بنایا گیا تھا۔ عدالت اس حوالے سے ان دعوؤں کی بھی تحقیقات کر رہی ہے کہ 2002ء میں کراچی میں گیارہ فرانسیسی انجینیئروں کی ہلاکت پاکستانی ایجنٹس کی کارروائی تھی، کیونکہ پیرس حکومت نے آبدوزوں کی ایک ڈیل کے تناظر میں پاکستانی متعلقہ حکام کو ناجائز خفیہ رقوم دینے سے انکار کر دیا تھا، جس کا پہلے وعدہ کیا گیا تھا۔

فرانسیسی خبر رساں ادارے اے ایف پی نے مقامی میڈیا کے حوالے سے بتایا ہے کہ پیر کو چار گھنٹے کی طویل سماعت کے دوران عدالت کو بتایا گیا کہ نکولا بازائر اسلحہ ڈیل سے ناجائز رقوم کے اس اسکینڈل میں ملوث ہیں، جو1995ء میں صدارتی امیدوار Edouard Balladur کی مہم میں استعمال میں لائی گئی تھیں۔ سابق وزیر اعظم بالادور کی مہم کے سابق سربراہ بازائر گزشتہ برس ستمبر سے زیر تفتیش تھے۔ اسی تناظر میں سابق فرانسیسی صدر نکولا سارکوزی کے دیگر دو ساتھیوں سے بھی پوچھ گچھ کا سلسلہ جاری ہے۔

اس وقت سابق صدر نکولا سارکوزی بالادور کی انتخابی مہم کے ترجمان اور بجٹ وزیر تھے۔ اس کیس کے ایک مبینہ کردار کے طور پر نکولا سارکوزی کا بھی نام لیا جاتا رہا ہے تاہم وہ ہمیشہ سے ہی ان الزامات کی صحت سے انکار کرتے رہے ہیں۔

فرانس نے 1994ء میں پاکستان کو آبدوزوں کی فروخت کی ایک ڈیل کی تھی۔ کہا جاتا ہے کہ اس ڈیل کے تحت پاکستانی متعلقہ حکام کو خفیہ طور پر رشوت دیے جانے کا ایک معاہدہ کیا گیا تھا تاہم بعد ازاں اس ڈیل کے منظر عام پر آ جانے کے بعد اس وقت کے صدر ژاک شیراک نے ان رقوم کی منتقلی رکوا دی تھی۔

( ab /sks (AFP