ڈی ڈبلیو کی جانب سے ترک زبان میں یوٹیوب چینل کا آغاز

یہ یوٹیوب چینل ’نئی صحافتی معلومات پیش‘ کرے گا۔ ڈوئچے ویلے (ڈی ڈبلیو) اور اس کے پارٹنر نشریاتی اداروں کے مطابق اس طرح نہ صرف ترک صارفین تک رسائی حاصل ہو سکے گی بلکہ ان ترک باشندوں تک بھی معلومات پہنچائی جا سکیں گی، جو بیرونی ممالک میں مقیم ہیں۔ جرمنی کا بین الاقوامی نشریاتی ادارہ ڈی ڈبلیو برطانوی نشریاتی ادارے بی بی سی، فرانسیسی ٹیلی وژن فرانس24 اور امریکی نشریاتی ادارے  وائس آف امریکا کے ساتھ مل کر یہ آن لائن ویڈیو مواد پیش کرے گا۔ ان چاروں اداروں کی طرف سے جاری کردہ ایک مشترکہ بیان کے مطابق رپورٹوں، تبصروں، جائزوں اور انٹرویوز کے ذریعے وسیع تر سماجی اور سیاسی موضوعات کا احاطہ کیا جائے گا۔

قابل اعتماد معلومات، آزاد رائے کی تشکیل

ڈوئچے ویلے کے ڈائریکٹر جنرل پیٹر لمبورگ کا کہنا تھا، ’’اس یوٹیوب چینل کے ذریعے ہم ترک صارفین کو ایسی قابل اعتماد معلومات فراہم کرنا چاہتے ہیں، جو آزاد رائے کی تشکیل میں ان کی  معاون ثابت ہوں گی۔ یہ بین الاقوامی میڈیا اداروں کے مابین تعاون کا ایک منفرد منصوبہ ہے، جس کا مقصد ترک زبان بولنے والے ایسے صارفین کو مواد فراہم کرنا ہے، جو بین الاقوامی سیاست، معیشت، سائنس اور ثقافت میں دلچسپی رکھتے ہیں۔‘‘

پیٹر لمبورگ ڈی ڈبلیو کے ان تین پارٹنر میڈیا ہاؤسز کے ذمہ دار نمائندوں کے ساتھ مل کر پیر انتیس اپریل کو استنبول میں ایک پریس کانفرنس کرتے ہوئے یہ یو ٹیوب چینل متعارف کرائیں گے اور اس کا عملی آغاز بھی ہو جائے گا۔ شروع میں اس چینل پر متعدد ویڈیوز موجود ہوں گی، جن میں ترکی میں تعمیراتی صنعت کے بحران اور کم عمری کی شادیوں سے متعلق رپورٹیں بھی شامل ہیں۔

ایک کھڑکی یورپ کی طرف

یہ منصوبہ ڈوئچے ویلے کی سن 2018ء سے 2021ء تک کی منصوبہ بندی کا حصہ ہے۔ اس منصوبہ بندی میں لکھا گیا ہے، ’’بہت سے لوگوں کی امیدوں کے برعکس ترک حکومت نے اس  یقین میں کسی شک کی گنجائش نہیں چھوڑی کہ وہ آمرانہ راستے پر گامزن ہے۔‘‘ ڈی ڈبلیو ترکی کے سماجی و سیاسی معاملات میں یورپی اقدار کی نمائندگی کرنا چاہتا ہے۔ ترک مارکیٹ میں اس مواد کو رائج کرنا یقینی طور پر ایک چیلنج ہے۔ ’’ترکی میں صحافتی سرگرمیاں جاری رکھنا مشکل ہوتا جا رہا ہے۔ ممکنہ نئے شراکت دار آزاد مغربی معلومات فراہم کرنے والے اداروں کے ساتھ تعاون کو زیادہ تر مسترد کرتے دکھائی دیتے ہیں۔‘‘

یہی وجہ ہے کہ ایک ذاتی پلیٹ فارم کا قیام انتہائی اہم ہوگا۔ تحریری منصوبہ بندی میں مزید لکھا گیا ہے، ’’یورپ کی طرف ایک کھڑکی کھولنے کے لیے ڈی ڈبلیو دیگر بین الاقوامی ذرائع ابلاغ کے ساتھ مل کر ایک مشترکہ یوٹیوب چینل اور ترک زبان کا ایک ٹی وی چینل شروع کرنے کا منصوبہ رکھتا ہے۔‘‘ جرمنی میں ٹیکس دہندگان کی رقوم سے چلنے والا ادارہ ڈی ڈبلیو ہر چار برس بعد اپنے لیے نئے اہداف کا تعین کرتا ہے۔ جرمنی کی وفاقی پارلیمان نے جون دو ہزار اٹھارہ میں اس ادارے کی سن دو ہزار اٹھارہ سے دو ہزار اکیس تک کی منصوبہ بندی کی منظوری دی تھی۔

دنیا بھر میں لاکھوں صارفین

ایسا پہلی مرتبہ ہو رہا ہے کہ چار بڑے مغربی میڈیا ادارے مل کر کسی منصوبے پر کام کر رہے ہیں۔ قبل ازیں ڈوئچے ویلے فرانسیسی میڈیا گروپ فرانس میڈیا موند (ایف ایم ایم)  اور فرانس24 نامی ادارے کے ساتھ مل کر کام کر چکا ہے۔  ڈوئچے ویلے دنیا کی تیس زبانوں میں آزادانہ معلومات فراہم کرتا ہے۔ ڈی ڈبلیو اور ’ایف ایم ایم‘  ٹی وی، ریڈیو اور اپنی ڈیجیٹل پیشکشوں کے ذریعے ہر ہفتے 320 ملین صارفین تک پہنچتے ہیں۔

اسی طرح برطانوی نشریاتی ادارہ بی بی سی بھی متعدد زبانوں میں ریڈیو، ٹی وی اور آن لائن سروسز فراہم کرتا ہے۔ بی بی سی کے بین الاقوامی پروگرام ہفتہ وار بنیادوں پر دنیا کے 279 ملین افراد تک پہنچتے ہیں۔ اس منصوبے کا چوتھا پارٹنر وائس آف امریکا ہے، جو امریکا کا سب سے بڑا بین لاقوامی ریڈیو بھی ہے۔ یہ میڈیا ہاؤس بھی دنیا کی چالیس زبانوں میں کام کرتا ہے اور ہفتہ وار بنیادوں پر اس کے صارفین کی تعداد تقریباﹰ 275 ملین ہے۔

گروسے پیٹرک / ا ا / م م