ڈاکٹر آفریدی پر رنگین مزاجی کے نئے الزامات

اطلاعات کے مطابق ڈاکٹر شکیل آفریدی شراب نوشی کا شوق رکھتے تھے، انتہائی رنگین مزاج تھے، یہاں تک کہ انہوں نے مبینہ طور پر نہ صرف خواتین پر جنسی حملے کیے بلکہ انہیں ہراساں بھی کیا۔ ساتھ ہی بتایا گیا ہے کہ ڈاکٹر آفریدی کو صرف آسان طریقے سے زیادہ سے زیادہ پیسےکمانے میں ہی دلچسپی تھی اور وہ دولت کے بارے میں جنونی تھے۔ خبر رساں ایجنسی روئٹرز نے پاکستانی شعبہ صحت کی وہ دستاویزات بھی دیکھی ہیں، جن سے ظاہر ہوتا ہے کہ 2002ء میں ان کے شعبے نے انہیں ایک بدعنوان، ناقابل اعتبار اور سرکاری ملازمت کے لیے ناموزوں شخص قرار دے دیا تھا۔ بتایا گیا ہے کہ ڈاکٹر آفریدی کو گرفتاری سے قبل ہی اس نوعیت کے متعدد الزامات کا سامنا تھا۔

امریکی حکام ڈاکٹر آفریدی کو ہیرو کا درجہ دے رہے ہیں اور انہوں نے ان پر عائد ان نئے الزامات کو بے بنیاد قرار دیا ہے۔ واشنگٹن میں ایک سینئر امریکی اہلکار نےکہا کہ انہیں آفریدی کے حوالے سے کسی بھی قابل اعتراض رویے کا کوئی علم نہیں ہے۔ ’’ہماری معلومات کے مطابق ڈاکٹر آفریدی اپنے شعبے کے ایک قابل بھروسہ اور باعزت رکن ہیں۔ ان کی گرفتاری اور نئے الزامات انہیں بدنام کرنے کی ایک سازش ہے۔‘‘ ایک اور امریکی اہلکار کے مطابق پاکستانی حکام ایک ایسے شخص کی کردار کشی کر رہے ہیں، جس نے ’’مطلوب ترین دہشت گرد اسامہ بن لادن کو پکڑنے میں مدد دی اور بن لادن کے ہاتھ پاکستانیوں کے خون سے بھی رنگے ہوئے تھے۔‘‘

خیبر ایجنسی میں شعبہ صحت کے سابق اعلیٰ ترین سرکاری افسر طارق حیات نے بتایا کہ وہ شکیل آفریدی کو اس وقت سے جانتے ہیں، جب وہ سینئر میڈیکل افسر کے عہدے پر ہسپتال میں فائز تھے۔ ’’میری دو مرتبہ شکیل آفریدی سے ملاقات ہوئی ہے۔ میں نے اُن سے ایک نرس کے ساتھ زیادتی کرنے اور ہسپتال کے آلات چرانے کے الزامات کے حوالے سے پوچھ گچھ کی تھی۔ میں نے انہیں باور کرایا تھا کہ وہ ایک بدکردار اور بے اصول انسان ہیں۔‘‘

ڈاکٹر آفریدی کے بھائی جمیل آفریدی نے کہا ہے، ’’اگر میرے بھائی نے کچھ غلط کیا ہوتا تو اس کے پاس امریکی ویزا ہے، وہ پاکستان سے فرار ہو کر امریکا جا سکتا تھا‘‘۔ تاہم انہوں نے ہراساں کرنے اور بدعنوانی کے الزامات کے حوالے سے کچھ بھی نہیں کہا۔ ’’میری جان کو خطرہ ہے، اس وجہ سے میں روپوش ہوں بلکہ تمام گھر والوں کی جان خطرے میں ہے‘‘۔ شکیل آفریدی پر لگائے جانے والے ان نئے الزامات کی آزاد ذرائع سے تصدیق نہیں ہو پائی ہے۔ آفریدی خاندان کے وکیل نے بھی اس نئے تنازعے پرکسی بھی قسم کا بیان دینے سے گریز کیا۔

ai / mm (Reuters)