چینی کار ساز کمپنیوں کا جرمن مارکیٹ میں مشروط خیر مقدم

جرمن چانسلر اولاف شولس نے کہا ہے کہ جرمنی کی مارکیٹ میں چینی کاروں کا خیرمقدم کیا جائے گا لیکن اس کے ساتھ ہی انہوں نے غیر منصفانہ تجارتی طریقوں کے استعمال کے خلاف بھی خبردار کیا۔ جرمنی کی معیشت کو جہاں کاروں سے لے کر کیمیکلز جیسی چینی مصنوعات سے فائدہ ہوا ہے، وہیں جرمن کمپنیوں کی طرف سے یہ شکایات بھی ہیں کہ انہیں چین کی منڈی میں غیر منصفانہ رکاوٹوں کا سامنا ہے۔ اس صورت حال کی وجہ سے دونوں ممالک کے تجارتی تعلقات میں تناؤ پایا جاتا ہے۔

چانسلر نے کیا کہا؟

 اولاف شولس، جو کئی سرکردہ جرمن ایگزیکٹوز کے ساتھ تین روزہ دورے پر چین میں موجود ہیں،  نے  شنگھائی کی ٹونگ جی یونیورسٹی میں گفتگو کرتے ہوئے کہ کاروباری مقابلہ ہمیشہ منصفانہ ہونا چاہیے۔

جرمن چانسلر کا کہنا تھا  کہ جب جاپانی اور جنوبی کوریائی کاریں یورپی مارکیٹ میں آئیں تو یہ خدشہ پیدا ہو گیا تھا کہ وہ اس مارکیٹ کو مکمل طور پر فتح کر لیں گی۔ لیکن اولاف شولس کے مطابق یہ سب ''بے معنی!‘‘ باتیں تھیں۔ انہوں نے کہا کہ اب جرمنی میں جاپانی کاریں اور جاپان میں جرمن کاریں ہیں۔ ان کے بقول، ''اور یہی بات چین اور جرمنی پر بھی لاگو ہوتی ہے۔‘‘

انہوں نے مزید کہا، ''کسی وقت جرمنی اور یورپ میں چینی کاریں بھی ہوں گی۔ صرف ایک چیز جو ہمیشہ واضح ہونی چاہیے وہ یہ ہے کہ مقابلہ منصفانہ ہونا چاہیے۔ دوسرے لفظوں میں یہ کہ کوئی ذخیرہ اندوزی، مقررہ سے زیادہ پیداوار اور کاپی رائٹس کی خلاف ورزی نہیں ہونی چاہیے ہیں۔‘‘

سفر میں اور کیا ہو رہا ہے؟

جرمن وفد چین کے سب سے بڑے شہر وائی میں جرمن پلاسٹک بنانے والی کمپنی کووسٹرو کے ایک اختراعی مرکز کا دورہ کرے گا۔ بعد ازاں پیر کے روز جرمن چانسلر شنگھائی میں حکمران کیمونسٹ پارٹی کے سیکرٹری چن جننگ کے ساتھ کھاناکھائیں گے۔

شولس کے تین روزہ دورے کا دوسرا پڑاؤ شنگھائی میں ہے۔ وہ  منگل کو چینی صدر شی جن پنگ اور وزیر اعظم لی چیانگ سے بات چیت کے لیے بیجنگ جائیں گے۔ جرمن سربراہ حکومت کا دورہ اس وقت میں ہو رہا ہے، جب یورپی یونین اپنے  بلاک کے مینوفیکچررز کو زیادہ سستی درآمد شدہ چینی الیکٹرک کاروں سے بچانے کے لیے تعزیری محصولات پر غور کر رہی ہے۔

چانسلر کے ساتھ جرمن کمپنیوں کے ایک درجن چیف ایگزیکٹوز بھی ہیں، جن میں جرمن گاڑیاں بنانے والی کمپنیوں مرسڈیز بینز اور بی ایم ڈبلیو کے ساتھ ساتھ کیمیکل کمپنی بی اے ایس ایف کے اعلیٰ عہدیدران بھی شامل ہیں۔ یورپ کی سب سے بڑی کار ساز کمپنی فولکس واگن کے نمائندے اس سفر میں غیر حاضر ہیں۔

ش ر⁄ ع ب ( ڈی پی اے، روئٹرز)