چین کے لیے سام سنگ کے رازوں کی چوری، ملزم پر فرد جرم عائد

سیول سے موصولہ رپورٹوں کے مطابق جنوبی کوریائی دفتر استغاثہ نے منگل تیرہ جون کے روز بتایا کہ ملزم سام سنگ کمپنی کا ایک سابق اعلیٰ عہدیدار ہے، جس پر الزام ہے کہ اس نے اپنے آجر ادارے کی الیکٹرانک چپ تیار کرنے والی ٹیکنالوجی چرائی تھی۔

جنوبی کوریا: مالی جرائم کے قصوروار سام سنگ کے مالک کو معافی مل گئی

فرد جرم کے مطابق ملزم نے سینکڑوں ملین ڈالر مالیت کی یہ ٹیکنالوجی اس لیے چوری کی کہ بعد میں بالکل ایسے ہی چپ تیار کرنے کے لیے ایک فیکٹری چین میں لگائی جا سکے۔

جنوبی کوریائی دارالحکومت سیول میں سُووان کے ڈسٹرکٹ کے اسٹیٹ پراسیکیوٹر کے دفتر نے نیوز ایجنسی اے ایف پی کو بتایا کہ ملزم کی اس وقت عمر 65 برس ہے اور اس نے سام سنگ کی اس ٹیکنالوجی کے ڈیزائن 2018ء اور 2019ء میں اس عظیم الجثہ ادارے کے ایک فیکٹری پروجیکٹ اور 'کلین روم‘ سے چوری کیے تھے۔

'چوری چین میں چپ فیکٹری لگانے کے لیے کی گئی‘

جنوبی کوریائی حکام کے مطابق ملزم نے سام سنگ کے یہ انتہائی پیش قیمت راز اس لیے چوری کیے تھے کہ بعد میں چین کے ساتھ مل کر چینی شہر شی آن میں سیمی کنڈکٹر تیار کرنے والی ایک نئی فیکٹری لگائی جا سکے۔

سام سنگ سربراہ کے وارثوں پر وراثت ٹیکس گیارہ ارب امریکی ڈالر

چینی شہر شی آن کی خاص بات یہ ہے کہ وہاں ایسے الیکٹرانک چپ تیار کرنے والی سام سنگ کی ایک فیکٹری پہلے ہی سے کام کر رہی ہے اور صنعتی راز چوری کر کے نئی فیکٹری سام سنگ کے اسی پیداواری یونٹ کے مقابلے میں قائم کی جانا تھی۔

سیول میں دفتر استغاثہ نے ملزم کی شناخت ظاہر نہیں کی لیکن اس بات کی تصدیق کی کہ ملزم اس وقت اپنے خلاف عدالتی کارروائی سے قبل حکام کی تفتیشی حراست میں ہے۔

جنوبی کوریا کی قومی سلامتی

اسٹیٹ پراسیکیوٹرز نے یہ تصدیق بھی کی کہ اس جنوبی کوریائی باشندے نے چین کے لیے سام سنگ کے ایسے راز اور تکنیکی مواد چوری کیے، جنہیں ملکی حکومت نے 'نیشنل کور ٹیکنالوجی‘ قرار دے رکھا ہے۔

فائیو جی نیٹ ورک لانچ کرنے والا دنیا کا اولین ملک

'نیشنل کور ٹیکنالوجی‘ سے مراد ایسی معلومات اور ایسا تکنیکی مواد ہیں، جو حکومتی موقف کے مطابق اگر کسی طرح بیرون ملک پہنچ جائیں، تو وہ ممکنہ طور پر جنوبی کوریائی معیشت اور اس ملک کی قومی سلامتی کے لیے شدید نقصانات کا باعث بن سکتے ہیں۔

سیمی کنڈکٹرز کے لیے امریکہ اور چین کا مقابلہ

جدید الیکٹرانکس کی دنیا میں سیمی کنڈکٹر کہلانے والے الیکٹرانک چپ آج اتنی زیادہ اہمیت اختیار کر چکے ہیں کہ ان کی وجہ سے دنیا کی سب سے بڑی معیشت امریکہ اور دوسری سب سے بڑی معیشت چین کے مابین ایک باقاعدہ کاروباری جنگ جاری ہے۔

سام سنگ کے ارب پتی وارث کو پانچ سال کی قید سزا کا حکم

یہ دونوں اقتصادی طاقتیں سیمی کنڈکٹر تیار کرنے کی ٹیکنالوجی میں اور ان کی دنیا بھر کی پیداواری منڈیوں کو ترسیل کے لیے ایک دوسرے پر سبقت حاصل کر لینا چاہتی ہیں۔

اس پس منظر میں یہ بات بھی اہم ہے کہ جنوبی کوریا میں سام سنگ کے جو صنعتی پیداواری راز چرائے گئے، ان کی مدد سے ایک فیکٹری مبینہ طور پر چین میں ہی لگائی جانا تھی۔

سام سنگ بزنس گروپ کتنا بڑا ہے؟

جہاں تک زیر حراست ملزم کا تعلق ہے، تو وہ ایک ایسا شخص بتایا گیا ہے، جس نے اس صنعتی شعبے میں عشروں تک کام کیا اور جو سیمی کنڈکٹرز کی تیاری کی صنعت کا سرکردہ ماہر مانا جاتا ہے۔

جنوبی کوریا بچوں کی پرورش کے لحاظ سے دنیا کا مہنگا ترین ملک

جنوبی کوریائی حکام کے مطابق ملزم نے جو راز چوری کیے، ان کی مالیت کم از کم بھی 300 بلین وان یا 236 ملین امریکی ڈالر کے برابر بنتی ہے۔

سام سنگ الیکٹرانکس دنیا بھر میں الیکٹرانک چپس اور سمارٹ فونز بنانے والے سب سے بڑے اداروں میں سے ایک ہے۔ یہ کمپنی جس بہت بڑے سام سنگ بزنس گروپ کا حصہ ہے، اس کو اتنی زیادہ آمدنی ہوتی ہے کہ وہ جنوبی کوریا کی مجموعی قومی پیداوار کا پانچواں حصہ بنتی ہے۔

م م / ع ا (اے پی، اے ایف پی)