چین میں بارشیں اور لینڈ سلائیڈنگ، 28 ہلاک

چین میں طوفانی بارشوں کا آغاز اتوار سات جولائی سے ہوا۔ چین کی شہری معاملات سے متعلق وزارت کے مطابق اب تک اس سے 30 لاکھ سے زائد لوگ متاثر ہو چکے ہیں۔ ان میں قریب نصف یعنی 14لاکھ صوبہ سیچووان سے تعلق رکھتے ہیں، جہاں 62 افراد لاپتہ بھی ہیں۔

چین کی سرکاری نیوز ایجنسی سنہوا کی طرف سے جمعرات 11 جولائی کو بتایا گیا کہ صوبہ سیچووان کے علاقے ژونگ شِنگ میں لینڈ سلائیڈنگ کے سبب متعدد گھر تودوں تلے دب گئے، جس سے کم از کم 18 افراد ہلاک ہوئے۔

سیچووان کی صوبائی حکومت کے مطابق 12 دیگر افراد بدھ کے روز میانیانگ نامی گاؤں میں لینڈ سلائیڈنگ کے بعد سے لاپتہ ہیں۔ منگل کے روز جیانگ یوئے نامی شہر میں پانی کے تیز بہاؤ کے باعث ایک پُل گرنے کے بعد 12 افراد اور چھ گاڑیوں کا کوئی نشان نہیں مل رہا۔ اس صوبے میں ایسے تین واقعات ہوئے ہیں۔

خبر رساں ادارے اے ایف پی کے مطابق دیگر ہلاکتیں ملک کے دیگر علاقوں میں ہوئیں۔ ان میں دارالحکومت بیجنگ اور وسطی صوبے ہینان سے لے کر مغربی صوبہ شِنجیانگ تک کا علاقہ شامل ہیں۔

صوبے سیچووان میں بدھ 10 جولائی کو ہونے والی لینڈ سلائیڈنگ کے ایک اور واقعے کے بعد قریب 2000 لوگ ایک سرنگ میں پھنس کر رہ گئے، جنہیں امدادی کارکنوں نے نکالا۔

اے ایف پی نے چینی حکام کے حوالے سے بتایا ہے کہ سیچووان میں ایک لاکھ دس ہزار افراد کو محفوظ مقامات پر منتقل کیا گیا۔ صوبائی حکومت کی طرف سے ایک ویب سائٹ پر جاری کردہ بیان کے مطابق اس بات کا اندازہ لگانے کی کوشش کی جا رہی ہے کہ ان بارشوں کے باعث کتنا نقصان ہوا ہے۔