چیمپئنز لیگ کے سیمی فائنل میچوں میں جرمن اور ہسپانوی کلب مد مقابل

چیمپئنز لیگ کے نگران ادارے UEFA کے مطابق ہسپانوی کلب بارسلونا کو بائرن میونخ کا سامنا کرنا ہو گا اور ڈورٹمنڈ کے مد مقابل ریال میڈرڈ ہو گا۔ چیمپئنز لیگ کے پری کوارٹر فائنل، کوارٹر فائنل اور سیمی فائنل مرحلے کے تمام میچ دو دو مرتبہ کھیلے جاتے ہیں۔ اس اصول کے تحت یورپی کلبوں کے معتبر ٹورنامنٹ کے سیمی فائنل مرحلے کا پہلا راؤنڈ جرمن کلبوں کے ہوم گراؤنڈز پر کھیلا جا رہا ہے۔ اس طرح سیمی فائنل مرحلے میں کُل چار میچ کھیلے جائیں گے۔

پہلے مرحلے کے دو سیمی فائنل رواں مہینے کے آخری ہفتے میں رکھے گئے ہیں۔ پہلا سیمی فائنل میچ 23 اپریل کو بائرن میونخ کے ہوم گراؤنڈ میونخ شہر میں کھیلا جائے گا۔ میونخ کے بڑے اسٹیڈیم میں جرمن قومی فٹ بال لیگ کی چیمپئن ٹیم کا سامنا معتبر ہسپانوی کلب بارسلونا سے ہو گا۔ بارسلونا فٹ بال کلب کے ڈائریکٹر اماڈور ورناوے اُو (Amador Bernabeu) کے مطابق یہ میچ بارسلونا اور میونخ کے لیے مشکل ضرور ہے لیکن چیمپئنز لیگ کا امکاناً سب سے بہترین میچ ہے۔ دوسرا سیمی فائنل میچ چوبیس اپریل کو ڈورٹمنڈ اپنے ہوم گراؤنڈ میں ریال میڈرڈ کے خلاف کھیلے گا۔ ریال میڈرڈ فٹ بال کلب کی ٹیم گزشتہ سال اکتوبر میں اسی میدان میں ڈروٹمنڈ سے ہار گئی تھی۔

سیمی فائنل مرحلے کے جوابی راؤنڈ ایک ہفتے کے بعد اسپین میں کھیلے جائیں گے۔ تیس اپریل کو ڈورٹمنڈ اور ریال میڈرڈ کا میچ ہسپانوی شہر میڈرڈ کے بڑے اسٹیڈیم سنتیاگو ورناوے اُو اسٹیڈیم (Santiago Bernabéu Stadium) میں کھیلا جائے گا۔ پہلی مئی کو بائرن میونخ اور بارسلونا کی ٹیمیں سیمی فائنل دوسرے راؤنڈ کا میچ ہسپانوی شہر بارسلونا کے وسیع و عریض کم نَو (Camp Nou) اسٹیڈیم میں کھیلیں گی۔

یورپ کے اہم فٹ بال کلبوں کے معتبر ٹورنامنٹ چیمپئنز لیگ کے سیمی فائنل کا اسٹیج تو گزشتہ ہفتے کے دوران سج گیا تھا۔ پچھلے منگل اور بدھ کوکھیلے گئے چار کوارٹر فائنل میچوں کے دوسرے مرحلے کا اختتام ہو گیا تھا۔ ان میں منگل کے روز ہسپانوی کلب ریال میڈرڈ اور جرمن کلب ڈورٹمنڈ نے کوالیفائی کیا تھا جبکہ بدھ کی شام بقیہ دو کوارٹر فائنل کھیلے گئے اور ان میں جرمن اور ہسپانوی کلبوں بائرن میونخ اور بارسلونا نے اپنے اپنے میچ جیت کر سیمی فائنل کے لیے کوالیفائی کیا تھا۔

چیمپئنز لیگ کا فائنل میچ 25 مئی کے روز لندن کے ویمبلی اسٹیڈیم میں کھیلا جائے گا۔ یہ اسٹیڈیم ایک طرح سے انگلینڈ کا قومی اسٹیڈیم کہلاتا ہے اور یہی انگلستانی فٹ بال ٹیم کا ہوم گراؤنڈ بھی ہے۔ اس اسٹیڈیم میں گزشتہ تین سالوں کے دوران چیمپئنز لیگ کا فائنل میچ دوسری مرتبہ کھیلا جا رہا ہے۔ سن 2011 میں بھی چیمپئنز لیگ کے فائنل میچ کا میزبان یہی اسٹیڈیم تھا۔ تین سالوں میں دوسری مرتبہ چیمپئيز لیگ کے فائنل میچ کی میزبانی کی وجہ برطانوی فٹ بال ایسوسی ایشن کے قیام کے ڈیڑھ سو برس مکمل ہونے کے موقع پر کی جانے والی تقریبات کا حصہ ہے۔ ویمبلی اسٹیڈیم میں 90 ہزار شائقین کے بیٹھنے کی گنجائش ہے۔

(ah/as (AP