پی ایس ایل: شاہین آفریدی لاہور قلندرز کی قیادت کے لیے فٹ

شاہین شاہ آفریدی گھٹنے پر لگنے والی چوٹ کے باعث گزشتہ تین ماہ سے کرکٹ نہیں کھیل سکے لیکن اب وہ دوبارہ مکمل طور پر فٹ ہو گئے ہیں اور پی ایس ایل کے 13 فروری سے شروع ہونے والے نئے ایڈیشن میں دفاعی چیمپیئن لاہور قلندرز کی ٹیم کی قیادت کرتے ہوئے میدان میں اتریں گے۔

لاہور قلندرز کی ٹیم نے گزشتہ برس پہلی مرتبہ پی ایس ایل کا فائنل جیتا تھا اور اس وقت بھی اس ٹیم کی قیادت شاہین آفریدی ہی کر رہے تھے۔

اس مرتبہ بھی پاکستان کے اس ڈومیسٹک ٹی ٹوئنٹی کرکٹ ٹورنامنٹ میں مختلف فرنچائز ٹیموں کی طرف سے کھیلنے کے لیے کئی مشہور غیر ملکی کرکٹرز حصہ لے رہے ہیں۔

پاکستان سپر لیگ میں حصہ لینے والی ٹیموں کی تعداد چھ ہے جن میں سے لاہور قلندرز نے پچھلے سال پہلی مرتبہ یہ ٹائٹل جیتا تھا۔ اس کے علاوہ اسلام آباد یونائیٹڈ کی ٹیم دو مرتبہ یہ ٹائٹل جیت چکی ہے۔ ان دو کے علاوہ دیگر ٹیمیں ملتان سلطانز، کراچی کنگز، کوئٹہ گلیڈی ایٹرز اور پشاور زلمے ہیں، جو سب مختلف ایڈیشنز میں ایک ایک مرتبہ پی ایس ایل ٹائٹل جیت چکی ہیں۔

پی ایس ایل میں 'ہیلی کاپٹر شاٹ‘ کے چرچے

شاہین آفریدی نے پاکستان کی طرف سے اپنا پہلا بین الاقوامی کرکٹ میچ 2018ء میں کھیلا تھا۔ اس کے بعد سے لے کر اب تک طویل قد والے اور بائیں بازو سے فاسٹ بولنگ کرنے والے یہ کھلاڑی پاکستان کی قومی کرکٹ ٹیم کے بولنگ اسکواڈ کا کلیدی حصہ رہے ہیں۔

ٹی ٹوئنٹی: کرکٹ کا سب سے کماؤ پُوت

شاہین آفریدی کو کرکٹ کے ٹی ٹوئنٹی ورلڈ کپ کے فائنل میں انگلینڈ کے خلاف میچ کے دوران گھٹنے پر چوٹ لگ گئی تھی اور اس کے بعد سے وہ دوبارہ کھیلنے کے قابل ہونے کے لیے مسلسل ایک طویل بحالی پروگرام میں حصہ لیتے رہے ہیں۔

انہی کوششوں کے نتیجے میں وہ دوبارہ فٹ ہو گئے ہیں اور اب پی ایس ایل کے نئے ایڈیشن میں لاہور قلندرز کی قیادت کریں گے۔

م م / ش ر (اے پی)