پاکستان، پہلی بار خواتین کا گروپ کے ٹو سر کرنے کے مشن پر

پاکستان کی تاریخ میں پہلی بار صرف خواتین کوہ پیماؤں پر مشتمل ایک گروپ نے دنیا کی دوسری بلند ترین چوٹی کے ٹو کو سر کرنے کی مہم کا آغاز کر دیا ہے۔

اس مہم کے ایک منتظم سرباز خان نے بتایا ہے کہ اس گروپ میں چار اطالوی اور چار ہی پاکستانی خواتین شامل ہیں۔

علاوہ ازین سیاحت کے محکمے سے منسلک مقامی حکومت کے ترجمان راحت بیگ نے بتایا کہ چھ خواتین پر مشتمل ایک اور گروپ پیر کو کے ٹو سر کرنے کی مہم کا آغاز کرے گا۔

اس حوالے سے پاکستان الپائن کلب کے ترجمان کرار حیدری کا کہنا تھا کہ یہ پہلی بار ہے کہ صرف خواتین کا ایک گروپ، جس کے قیادت بھی خواتین ہی کر رہی ہیں، اس چوٹی کو سر کرنے نکلا ہے جسے "کلر ماؤٹن"، یعنی قاتل پہاڑ کے طور پر بھی جانا جاتا ہے۔

پاکستان کے شمال میں واقع کے ٹو کی اونچائی 8,611 میٹر ہے اور اس پر کوہ پیمائی کو دشوار ترین تصور کیا جاتا ہے۔ اس کو سر کرنے کی مہمات کے دوران متعدد  کوہ پیما اپنی جان سے ہاتھ بھی دھو بیٹھے ہیں۔

سرباز خان کے مطابق کوہ پیمائی کرنے والے خواتین کے دونوں گروپ تین ہفتوں سے ایک ماہ کے عرصے کے دوران چوٹی پر پہنچنے کا ارادہ رکھتے ہیں۔ تاہم اس کا دارومدار موسمی حالات پر بھی ہو گا۔

اس میں سے ایک گروپ میں سمینہ بیگ بھی شامل ہیں، جو اس سے پہلے بھی کے ٹو، ایورسٹ اور کئی اور چوٹیاں سر کر چکی ہیں۔ اپنی نئی مہم کے حوالے سے انہوں نے مقام ٹی وی چینل جیو نیوز پر گفتگو کے دوران کہا، "مجھے اس گروپ کا حصہ ہونے پر خوشی ہے۔ یہ ایک تاریخی کارنامہ ہوگا۔"

(ڈی پی اے) م ا ⁄ ع س