پاکستان: مسیحی خاتون کو جلا کر ہلاک کرنے والا شخص گرفتار

پاکستان کے صوبہ پنجاب کی پولیس کے ایک اہلکار اعجاز شاہد نے نیوز ایجنسی اے پی کو بتایا ہے کہ گزشتہ ہفتے ایک مسیحی خاتون کو جلا کر ہلاک کرنے کے الزام میں ایک شخص کو گرفتار کر لیا گیا ہے۔ پولیس کے مطابق اس مشتبہ ملزم کا نام رضوان گجر ہے۔

اداریہ: ’دنیا تو ان کو بوجھ سمجھتی رہی مگر‘

سیالکوٹ سے تعلق رکھنے والی عاصمہ یعقوب نامی مسیحی خاتون کو گزشتہ ہفتے اس کے گھر کے باہر مٹی کا تیل چھڑک کر آگ لگا دی گئی تھی۔ پولیس کے مطابق رضوان نے شادی کرنے سے انکار پر عاصمہ پر تیل چھڑک کر اسے آگ لگا دی تھی اور بعد میں فرار ہو گیا تھا۔

حکام کا کہنا ہے کہ عاصمہ آگ لگنے کے بعد شدید جھلس گئی تھی اور اسے سیالکوٹ سے لاہور کے ایک ہسپتال منتقل کر دیا گیا تھا جہاں وہ اتوار کے روز ہلاک ہو گئی تھی۔ پولیس کا یہ بھی کہنا ہے کہ رضوان گجر نے گرفتاری کے بعد اعتراف جرم بھی کر لیا ہے جس کے بعد اسے ٹرائل شروع کیے جانے تک جیل بھیج دیا گیا ہے۔

پاکستانی معاشرے میں اب بھی کچھ ایسے مرد ہیں جو کسی خاتون کے شادی سے انکار کرنے کو اپنی ’بے عزتی‘ تصور کرتے ہیں۔ ماضی میں بھی شادی سے انکار کرنے والی خواتین کو قتل کیے جانے یا ان پر تیزاب پھینکے جانے کے واقعات سامنے آتے رہے ہیں۔

ش ح / ا ا (اے پی)

ایک اور بیٹی کو ’مرد کی انا‘ کی بھینٹ چڑھا ديا گيا