پاکستان: ’برائیڈل ویک‘ عروسی ملبوسات کی نمائش

سپر اسٹار صبا قمر جو حال میں ہی اپنی فلم کملی کی عکس بندی سے فارغ ہوئی ہیں، سم سارا کے بنائے ہوئے روایتی سرخ رنگ کے بھاری کام والے لہنگا چولی میں ریمپ پر آئیں۔

پاکستان کے سب سے مقبول ڈراما سیریل ’میرے پاس تم ہو‘ کی مہوش یعنی عائزہ خان ہلکے گلابی اور روپہلے رنگ کے لباس میں جلوہ گر ہوئیں۔

گلوکار اور اداکار علی ظفر ریمپ پر عمران راجپوت کی تیار کردہ سیاہ شیروانی پہن کر اترے اور حاضرین سے داد سمیٹی۔

اداکارہ ماورا حسین جو پاکستان کے ساتھ بالی وڈ میں بھی کام کرچکی ہیں ، نسبتاً غیر روایتی رنگ کے لہنگے اور چولی میں ریمپ پر آئیں۔ ان کا لباس صدف عامر نے تیار کیا تھا۔

اپنی بہن ماورا حسین کے برعکس اداکارہ اور پروڈیوسر عروہ حسین نے ڈیزائنر شکیل کا تخلیق کردہ روایتی سرخ اور سنہری جوڑا پہنا۔

مقبول پاپ گلوکار ابرار الحق فہد حسین کے تخلیق کردہ سیاہ کرتے پاجامے اور کوٹ کے ساتھ ریمپ پر اترے اور اس دوران اپنا نیا گانا ’چمکیلی‘ بھی گایا۔

ممتاز رقاصہ نگہت چوہدری نے ڈیزائنر ماریہ بی کے لیے ریمپ پر ان کے بنائے ہوئے مشرقی لباس میں عمدہ رقص پیش کیا۔

مقبول اداکارہ سارہ خان بھی نیلوفر شاہد کے تیار کردہ لباس میں ریمپ پر جلوہ گر ہوئیں۔ سارہ خصوصاً انسٹاگرام پر بہت مقبول ہیں اور ان کے 35 لاکھ سے زیادہ فالوورز ہیں۔

ماڈل اور اداکارہ زباب رانا بھی رکی ملیون کے تیارکردہ سرخ لہنگے اور چولی میں ریمپ پر نظر آئیں، جو کہ خوبصورت روایتی کام سے بھرا ہوا تھا۔

اس مرتبہ غرارے بھی خوب دیکھنے میں آئے۔ فلم اسٹار نمرہ خان نے کوثر ساجد کے لیے ریمپ پر ایسا ہی ایک خوبصورت غرارہ زیب تن کیا۔

جلد آنے والی پاکستان فلم ’سچ‘ کے ہیرو اور ہیروئن اسد زمان اور علیزے شیخ نے بھی اپنی فلم کی تشہیر اسی پلیٹ فارم پر کی۔

پاکستان کی عالمی شہرت یافتہ ماڈل مُشک کلیم نے عروسی ملبوسات کی نمائش یعنی ’برائڈ کوٹیور ویک‘ کا باقاعدہ آغاز کیا۔