پاکستان اور افغانستان کی کرکٹ سیریز مؤخر

افغان کرکٹ بورڈ نے پاکستان سے درخواست کی کہ تین ستمبر سے شروع ہونے والی پاک افغان کرکٹ سیریز کو سن دو ہزار بائیس تک ملتوی کر دیا جائے۔ اس سیریز کے سلسلے میں تینوں میچ سری لنکا کے جنوبی صوبے ہامبانتوتا میں کھیلے جانا تھے۔

قبل ازیں افغان کرکٹ بورڈ نے کہا تھا کہ یہ سیریز پروگرام کے مطابق کھیلی جائے گی جبکہ افغان قومی کرکٹ ٹیم نے طالبان کے قبضے کے بعد بھی کابل کے اسٹیڈیم میں پریکٹس سیشن میں حصہ لیا تھا۔

کابل کے حامد کرزئی بین الاقوامی ہوائی اڈے پر افراتفری اور مسافر پروازوں کی منسوخی کی وجہ سے افغان کرکٹ بورڈ نے پلان بی کے تحت منصوبہ بنایا تھا کہ قومی کرکٹ ٹیم کے کھلاڑی پہلے پاکستان جائیں گے، جہاں سے وہ  دبئی کے رستے سری لنکا جائیں گے۔

تاہم افغانستان کی موجودہ صورتحال اور سری لنکا میں کووڈ انیس کے بڑھتے ہوئے کیسز کے تناظر میں افغان کرکٹ بورڈ نے اس سیریز کو مؤخر کرنے کی درخواست کی۔

 پاکستان کرکٹ بورڈ کی ویب سائٹ پر شائع ہونے والے ایک بیان کے مطابق افغانستان پر طالبان کے قبضے کے بعد افغان کھلاڑیوں کی ذہنی صحت، کابل میں مسافر پروازوں کی منسوخ اور سری لنکا میں کورونا کیسز کی تعداد میں اضافہ اس سیریز کو مؤخر کرنے کی وجہ بنا۔

پاکستان کرکٹ بورڈ (پی سی بی) نے اپنی ایک ٹوئٹ میں تصدیق کی ہے کہ افغانستان کرکٹ بورڈ (اے بی سی) کی درخواست پر اس سیریز کو ملتوی کر دیا گیا ہے۔ بتایا گیا ہے کہ دونوں ممالک اب سن دو ہزار بائیس میں اس سیریز کو کرانے کی کوشش کریں گے۔

جب طالبان انتہا پسندوں نے سن انیس سو چھیانوے میں پہلی مرتبہ افغانستان پر قبضہ کیا تھا تو تمام کھیلوں کو بھی اپنے کنٹرول میں لے لیا تھا۔ اس بنیاد پرست گروہ کا ماننا ہے کہ کھیل دراصل دین سے دوری کا باعث بنتے ہیں۔

تاہم طالبان جنگجوؤں نے ملک کا کنٹرول سنبھالنے کے بعد کہا تھا کہ وہ مردوں کی کرکٹ ٹیم کے معاملات میں مداخلت نہیں کریں گے۔ تاہم انہوں نے خواتین کے کرکٹ کھیلنے پر پابندی عائد کر دی تھی۔

ع ب/ ک م / (خبر رساں ادارے)