ٹی ٹوئنٹی سیریز پاکستان کے نام

دو میچوں کی سیریز کا پہلا میچ یکم مارچ کو ڈربن میں کھیلا جانا تھا تاہم بارش کے باعث یہ میچ نہیں ہو سکا تھا۔ اس لیے پاکستان نے اس میچ میں فتح کے ساتھ ہی یہ سیریز میں بھی اپنے نام کر لی ہے۔

قبل ازیں اس دورے کے دوران کھیلی جانے والی تین میچوں کی ٹیسٹ سیریز میں میزبان جنوبی افریقہ نے پاکستانی ٹیم کو تمام میچز میں شکست دے کر وائٹ واش کر دیا تھا۔ ناقص کارکردگی اور بری طرح شکست سے دو چار ہونے پر پاکستانی شائقین اور سابق کھلاڑیوں کی طرف سے پاکستانی کھلاڑیوں کو شدید تنقید کا نشانہ بنایا جا رہا تھا۔

سنچورین میں اتوار تین مارچ کو کھیلے جانے والے اس میچ میں پاکستانی کپتان محمد حفیظ نے ٹاس جیت کر پہلے بیٹنگ کا فیصلہ کیا۔ ان کا یہ فیصلہ ٹیم کے حق میں ثابت ہوا اور پاکستانی ٹیم نے مقررہ 20 اوورز میں سات وکٹوں کے نقصان پر 195 رنز بنائے۔ کپتان محمد حفیظ نے شاندار بیٹنگ کا مظاہرہ کرتے ہوئے 86 رنز اسکور کیے۔ دوسرے سب سے زیادہ رنز بنانے والے بیٹسمین اوپنر احمد شہزاد رہے۔ انہوں نے 46 رنز بنائے۔

پاکستانی بیٹسمینوں کی طرف سے عمدہ بیٹنگ کے بعد بولرز نے بھی شاندار کارکردگی کا مظاہرہ کیا۔ فاسٹ بولر عمر گُل اور محمد حفیظ نے جنوبی افریقی کھلاڑیوں کو گویا باندھ کر رکھ دیا۔ عمر گُل نے حیران کن بولنگ کرتے ہوئے 2.2 اوورز میں پانچ کھلاڑیوں کو پویلین کی راہ دکھائی اور صرف چھ رنز دیے۔ محمد حفیظ نے بھی عمدہ بولنگ کا مظاہرہ کرتے ہوئے تین اوورز میں تین وکٹیں حاصل کیں۔ محمد عرفان اور جنید خان کے حصے میں ایک ایک وکٹ آئی۔

جنوبی افریقہ کی ٹیم 12.2 اوورز میں محض 100 رنز بنا کر آؤٹ ہو گئی۔ جنوبی افریقہ کی طرف سے سب سے زیادہ 36 رنز اوپنر بیٹسمین اے بی ڈویلیئرز نے بنائے۔

شاندار بیٹنگ اور بولنگ کے اعتراف میں پاکستانی کپتان محمد حفیظ کو میچ کا بہترین کھلاڑی قرار دیا گیا۔

پاکستان اور جنوبی افریقہ کے درمیان اب پانچ میچوں پر مشتمل ون ڈے سیریز کھیلی جانی ہے۔ پہلا میچ اتوار 10 مارچ کو بلومفیلڈ میں ہو گا۔

رپورٹ: افسر اعوان

ادارت: ندیم گِل