ویمبلی فائنل میچ کی ریہرسل: بائرن اور ڈورٹمنڈ کا میچ برابر

بنڈس لیگا اب اپنے اختتام کے قریب ہے۔ اس کے مزید دو میچ ڈیز باقی رہ گئے ہیں۔ ہفتے کے روز گزشتہ سال کی چیمپئن ڈورٹمنڈ اور رواں سیزن کی چیمپئن بائرن میونخ کے درمیان کانٹے دار میچ کھیلا گیا۔ اس میچ کو اسی ماہ کی 25 تاریخ کو برطانوی دارالحکومت لندن کے ویمبلی اسٹیڈیم میں چیمپئنز لیگ کے فائنل میچ کی ریہرسل قرار دیا جا رہا تھا۔

ڈورٹمنڈ اور بائرن میونخ کے میچ میں خاصا جارحانہ کھیل پیش کیا گیا۔ بائرن کسی بھی طور پر اس میچ کو جیتنے کی کوشش میں تھی اور اس دوران اس کے پانچ کھلاڑیوں کو مختلف فاؤل کرنے پر میچ ریفری کی جانب سے زرد کارڈ دکھایا گیا۔ ایک کھلاڑی کو میچ سے باہر بھیج دیا گیا تھا۔ اس میچ کا ایک اور ڈرامہ بائرن کے گول کیپر مانویل نوئیر کا ڈورٹمنڈ کے لیوانڈووسکی کی پنالٹی کو روکنا بھی تھا۔

میچ ریفری کی جانب سے ڈورٹمنڈ کو دی جانے والی پنالٹی کک کو بھی بائرن میونخ کے کھلاڑیوں نے احتجاج کر کے متنازعہ بنا دیا تھا۔ ریفری کے مطابق ڈورٹمنڈ کے ترک نژاد کھلاڑی نوری شاہین کی کِک کو بائرن کے کھلاڑی ژیروم بوٹنگ (Jerome Boateng) نے روکتے ہوئے ہاتھ لگا دیا تھا۔ اس پنالٹی کِک پر بائرن میونخ کے کھلاڑیوں نے پرزور احتجاج بھی کیا مگر ریفری نے اپنا فیصلہ تبدیل نہیں کیا۔ ریال میڈرڈ کے خلاف چار گول کرنے والے پولستانی کھلاڑی رابرٹ لیوانڈووسکی کی لگائی ہوئی کِک بائرن کے گول کیپر مانویل نویئر نے روک لی۔

اسی ہزار شائقین کے سامنے بائرن میونخ کے بعض کھلاڑیوں نے خاصے جارحانہ کھیل کا مظاہرہ کیا۔ برازیل سے تعلق رکھنے والے رافینا کو دوسری مرتبہ خطرناک فاؤل کرنے پر ریفری نے دوسرا زارڈ کارڈ تھما کر میچ سے باہر کر دیا۔ اس پر بھی بائرن میونخ کے کھلاڑیوں نے ایک مرتبہ پھر واویلا کرنا شروع کر دیا مگر ان کا احتجاج ریفری کے فیصلے کو تبدیل نہیں کر سکا۔ میچ کے دوران بائرن میونخ کے پانچ کھلاڑیوں کو زرد کارڈ دکھایا گیا۔ ڈورٹمنڈ کے صرف ایک کھلاڑی کو زرد کارڈ حاصل ہوا۔

ڈورٹمنڈ اور بائرن میونخ کے اس کانٹے دار میچ میں ڈورٹمنڈ نے گیارہویں منٹ میں گول کر کے برتری حاصل کر لی تھی۔ یہ گول جرمن فارورڈ کھلاڑی کیون گروس کوئٹز (Kevin Großkreutz) نے کیا۔ ڈورٹمنڈ کی برتری کو پہلے ہاف کے چھبیسویں منٹ میں ماریو گومیز نے گول کر ختم کر دیا۔ اس کے بعد میچ بغیر کسی مزید گول کے برابری پر ختم ہوا۔ دونوں ٹیموں کو ایک ایک پوائنٹ حاصل ہوا۔

ڈورٹمنڈ اور بائرن میونخ یورپی فٹ بال کلبوں کے معتبر ٹورنامنٹ چیمپئنز لیگ کے سیمی فائنل مرحلے میں کامیابی حاصل کر چکے ہیں۔ ان دونوں ٹیموں کے درمیان لندن شہر کے نواح میں واقع ویمبلی اسٹیڈیم میں چیمپئنز لیگ کا فائنل میچ اسی ماہ کی پچیس تاریخ کو کھیلا جائے گا۔

(ah/sks(Reuters