وسطی غزہ پر اسرائیلی بمباری شروع، مزید درجنوں فلسطینی ہلاک

غزہ میں حماس کے زیر کنٹرول وزارت صحت کے ایک بیان کے مطابق بدھ کے روز خان یونس کے علاقے میں العمل ہسپتال کے قریب ایک اسرائیلی فضائی حملے میں کم از کم 20 فلسطینی ہلاک ہوئے ہیں۔ اس حوالے سے اسرائیلی فوج کی جانب سے فوری طور پر کوئی تبصرہ سامنے نہیں آیا۔ وزارت صحت کے مطابق گزشتہ 24 گھنٹوں میں ہلاک ہونے والے فلسطینیوں کی مجموعی تعداد 195 بنتی ہے۔

غزہ میں وزارت صحت کے مطابق اسرائیلی بمباری میں اب تک تقریباﹰ 21 ہزار سے زائد فلسطینی ہلاک ہو چکے ہیں جبکہ بے گھر ہونے والے فلسطینیوں کی تعداد تقریباﹰ بیس لاکھ بنتی ہے۔ اسی طرح زخمی فلسطینیوں کی تعداد 55 ہزار سے زائد ہے۔

عالمی ادارہ صحت (ڈبلیو ایچ او) نے بروز بدھ ایک نئی ویڈیو جاری کی ہے، جو زیادہ تر پیر اور منگل کو غزہ کے متعدد ہسپتالوں میں بنائی گئی فوٹیجز پر مشتمل ہے۔ ڈبلیو ایچ او کی ایمرجنسی میڈیکل ٹیم کے کوآرڈینیٹر شان کیسی نے کہا ہے کہ 80 دن پہلے کی نسبت اب غزہ میں نظام صحت کا صرف 20 فیصد کام کر رہا ہے۔

'یہ قتل و غارت گری ہے‘

کوآرڈینیٹر شان کیسی کا کہنا تھا، ''اس وقت ان ہسپتالوں میں ہر طرف خون ہی خون ہے۔‘‘ انہوں نے مزید کہا کہ غزہ میں کہیں بھی کوئی جگہ محفوظ نہیں ہے۔ ان کا کہنا تھا،  ''ہم دیکھ رہے ہیں کہ دروازوں سے صرف صدمے سے دوچار افراد ہی آ رہے ہیں اور یہ صورت حال اتنی پریشان کن ہے کہ اس پر یقین کرنا کافی مشکل ہے۔ یہ خونریزی ہے، جیسا کہ ہم نے پہلے کہا، یہ فقط قتل و غارت گری ہے۔‘‘

'غزہ جنگ کئی مہینوں تک جاری رہ سکتی ہے‘

دوسری جانب اسرائیل کے چیف آف جنرل اسٹاف ہرزی حلیوی کے مطابق غزہ میں فلسطینی عسکریت پسند تنظیم حماس کے خلاف جنگ طویل عرصے تک جاری رہے گی۔ اسرائیلی فوج کے سربراہ حلیوی نے غزہ کی سرحد پر صحافیوں کو بتایا کہ جب حماس کو ختم کرنے کی بات آتی ہے، تو اس کا کوئی ''جادوئی حل نہیں ہے اور اور نہ ہی کوئی شارٹ کٹ‘‘ ہے۔ اسرائیل کے اس اعلیٰ ترین فوجی کمانڈر نے کہا کہ یہ جنگ مہینوں تک جاری رہے گی اور اس میں طویل عرصے تک ''مختلف طریقے‘‘ آزمائے جائیں گے۔ حالیہ دنوں کے دوران اسرائیل غزہ میں اپنی جنگی کارروائیاں تیز کر چکا ہے جبکہ اس نے وسطی غزہ میں بھی عسکری کارروائیوں کا آغاز کر دیا ہے۔

اسرائیلی یرغمالیوں کی ممکنہ رہائی

امریکی صدر جو بائیڈن نے قطر کے امیر شیخ تمیم بن حمد الثانی کے ساتھ اسرائیل اور حماس کی جنگ میں مزید یرغمالیوں کی ممکنہ رہائی پر تبادلہ خیال کیا ہے۔ وائٹ ہاؤس کے مطابق اس بات چیت میں غزہ پٹی تک انسانی ہمدردی کی بنیاد پر امدادی سامان کی فراہمی ممکن بنانے پر بھی تبادلہ خیال کیا گیا۔

 نومبر کے آخر میں حماس نے قطر کی ثالثی میں فلسطینی قیدیوں کی رہائی کے بدلے 240 یرغمالیوں میں سے 105 کو اسرائیل کے حوالے کر دیا تھا۔ حماس کے عسکریت پسندوں نے سات اکتوبر کو اسرائیل پر دہشت گردانہ حملہ کرتے ہوئے تقریباً 12 سو اسرائیلیوں کو ہلاک جبکہ 240 کو یرغمال بنا لیا تھا۔

ا ا / ش ر، م م (اے ایف پی، ڈی پی اے، روئٹرز)