نیپال میں لینڈ سلائیڈنگ، بس ندی میں جا گری، 55 افراد لاپتہ

نیپال میں امدادی کارکنوں کا کہنا ہے کہ وہ لینڈ سلائیڈنگ کے نتیجے میں گمشدہ ہو جانے والے 55 افراد کی تلاش جاری رکھے ہوئے ہیں تاہم اتنا وقت گزر جانے کے بعد اب ان افراد کے زندہ بچ جانے کی امید دم توڑ رہی ہے۔

متعلقہ ضلع کے ڈپٹی چیف ایڈمنسٹریٹر کھیمانند بھوسال کے مطابق پانچ سو امدادی کارکنوں پر مشتمل ایک ٹیم نیپال کے دارالحکومت کھٹمنڈو سے تقریباً 86 کلومیٹر دور واقع چٹوان ضلع میں جمعے کو پیش آنے والے حادثے کے مقام پر آج تلاش کا کام ایک بار پھر شروع کر چکی ہے۔ تاہم سکیورٹی اہلکاروں اور غوطہ خوروں کو ابھی تک بس کی کھڑکیوں میں سے صرف ایک پردہ اور چند کپڑے ہی ملے ہیں۔

لاپتہ مسافروں میں سات بھارتی شہری بھی شامل تھے۔ لینڈ سلائیڈنگ کی زد میں آنے سے پہلے تین دیگر مسافر بس کی کھڑکیوں سے باہر چھلانگ لگا کر اپنی جان بچانے میں کامیاب ہوگئے۔

بھوسال نے خبررساں ادارے روئٹرز کو بتایا، ''گمشدہ افراد کے زندہ بچ جانے کی امید اب کم ہو رہی ہے کیونکہ بس کو ندی میں گرے تیس گھنٹے سے زائد کا وقت بیت چکا ہے۔ پانی کی سطح میں کمی آئی ہے تاہم اب بھی امدادی ٹیم کو مشکلات کا سامنا ہے۔‘‘

نیپال میں مون سون کی بارشوں کے نتیجے میں لینڈ سلائیڈنگ اور سیلاب کے نتیجے میں جون کے وسط سے اب تک کم از کم 91 افراد ہلاک ہو چکے ہیں۔ جمعہ کو سوشل میڈیا پر آنے والی تصاویر میں دریائے ترشولی میں تیزی سے بہنے والی امدادی کشتیاں دیکھی جا سکتی ہیں۔

لینڈ سلائیڈنگ کی وجہ سے حادثات کی بڑھتی تعداد کے سبب حکومت نے ایسے مقامات پر رات کے وقت بسوں کے سفر پر پابندی لگانے کے منصوبے کا اعلان کیا، جہاں موسم خراب ہونے کا خدشہ زیادہ رہتا ہے۔

ر ب/ ا ا (روئٹرز)