نیپال: لاپتہ مسافر بردار طیارے کا ملبہ مل گیا

نیپالی آرمی کے ترجمان نارائن سلوان نے پیر کے روز بتایا کہ فوج نے اس لاپتہ مسافر بردار طیارے کے ملبے کا پتہ لگالیا ہے جس پر 22 افراد سوار تھے۔ انہوں نے بتایا کہ آرمی کے جوانوں نے جائے حادثہ پر تلاشی اور بچاو کی مہم شروع کردی ہے۔

انہوں نے ٹوئٹر پر ایک تصویر پوسٹ کی ہے جس میں طیارے کے ملبے کو دیکھا جاسکتا ہے۔ تصویر میں طیارے کے پچھلے حصے اور اس کے بکھرے ہوئے حصے دیکھے جاسکتے ہیں۔

نیپالی آرمی نے اس حادثے میں کسی کے زندہ بچنے کے حوالے سے فی الحال کچھ نہیں بتایا ہے۔

متعدد ممالک کے شہری طیارے پر سوار تھے

ایئرلائنز اور حکومتی عہدیداروں کے مطابق یہ طیارہ ایک پرائیوٹ کمپنی تارا ایئر کی ملکیت میں تھا۔ اس پر چار بھارتی، دو جرمن اور 16 نیپالی شہریوں سمیت22 افرا د سوا ر تھے۔

طیارے نے اتوار کے روز دارالحکومت کٹھمنڈو سے تقریبا ً 125 کلومیٹر دور پوکھرا قصبے سے جوم سوم نامی ایک مقبول سیاحتی اور مذہبی مقام کے لیے پرواز کیا تھا۔ گوکہ طیارے کی پرواز صرف 20 منٹ کی تھی لیکن منزل سے ذرا پہلے ہی ایرپورٹ کے ٹاور سے اس کا رابطہ منقطع ہوگیا۔

خراب موسم اور تاریکی کی وجہ سے رات کو تلاشی کا کام ممکن نہیں ہوسکا۔ آرمی کے ہیلی کاپٹر اور پرائیوٹ ہیلی کاپٹروں نے آج پیر کی صبح تلاشی کا کام شروع کیا۔

نیپال کی سول ایوی ایشن اتھارٹی کے ترجمان دیو چندر لال کرنا نے بتایا کہ متاثرین کو بچانے کے لیے پانچ ہیلی کاپٹروں کو تیار رکھا گیا ہے۔

فلائٹ ٹریکنگ کی ویب سائٹ فلائٹ رڈار 24 کے مطابق اس طیارے کا رجسٹریشن نمبر 9N-AET تھا اور اس نے اپنی پہلی پرواز اپریل 1979 میں کی تھی۔

پہلے بھی فضائی حادثات ہوتے رہے ہیں

 نیپال میں دنیا کی بلند ترین پہاڑی چوٹیاں ہیں۔ دنیا کے 14بلندترین پہاڑوں میں سے آٹھ نیپال میں ہیں۔ ان میں ماونٹ ایورسٹ بھی شامل ہے۔

 بہت سے علاقوں میں انتہائی بلند اور مشکل مقامات پر طیاروں کو لینڈ کرنا پڑتا ہے۔یہاں کا موسم اچانک تبدیل ہوجاتا ہے اور پہاڑی علاقوں میں واقع ہوائی پٹیوں تک پہنچنا بہت دشوار ہوتا ہے۔

اس ملک میں پہلے بھی فضائی حادثات ہوتے رہے ہیں۔ سن 2018 کے اوائل میں ڈھاکہ سے کٹھمنڈو کی پرواز کے دوران یو ایس۔ بنگلہ ایئرلائنس کے طیارے میں زمین پر اترتے وقت آگ لگ گئی تھی جس سے اس پرسوار71 افراد میں سے 51 ہلاک ہوگئے تھے۔ سن 2016 میں مایاگدی ضلع کے پہاڑوں میں ایک طیارہ حادثے کا شکار ہوجانے سے اس پر سوار 23 افراد کی موت ہوگئی تھی۔

 ج ا/ ص ز (روئٹر، اے ایف پی)