فلپائنی صحافی ماریا ریسا ٹیکس چوری کے الزام سے بری

فلپائن کی ایک عدالت نے بدھ کے روز نوبل امن انعام یافتہ صحافی ماریا ریسا اور حکومت کی نکتہ چینی کرنے والی ان کی آن لائن ویب سائٹ 'ریلپر' کو ٹیکس چوری کے چار الزامات سے بری کر دیا۔

ریسا نے سن 2020 میں اپنی عرضی میں کہا تھا کہ انہوں نے کوئی ٹیکس چوری نہیں کی ہے۔

ٹیکس چوری کا مقدمہ حکومت کی جانب سے دائر کردہ ان متعدد مقدمات میں سے ایک ہے جن کا ریپلر کو سامنا ہے۔ حکومت کے اس رویے نے جنوب مشرقی ایشیائی ملک میں آزادی صحافت کے حوالے سے خدشات پیدا کر دیے ہیں۔

نوبل امن انعام یافتہ ماریہ ریسا کا گلوبل میڈیا فورم سے خطاب

منیلا سے شائع ہونے والے ریپلر کی سی ای او اور ایگزیکٹیو ایڈیٹر ریسا کو ان کی خدمات کے اعتراف میں سن 2021 میں نوبل امن انعام سے نوازا گیا تھا۔ وہ نوبل انعام حاصل کرنے والی پہلی فلپائن بن گئی تھیں۔

'سچ کی فتح، انصاف کی فتح'

بدھ کے روز عدالت کے باہر نامہ نگاروں سے خطاب کرتے ہوئے ماریا ریسا نے کہا کہ یہ ہر ایک کے لیے "جذباتی" لمحہ ہے۔ انہوں نے الزامات کو "سیاسی اغراض پر مبنی'' قرار دیتے ہوئے کہا کہ اس کا مقصد صحافیوں کو ان کے کام سے روکنے کی کوشش کرنا ہے۔

انہوں نے مقدمے کا ذکر کرتے ہوئے کہا، "عدالت کا فیصلہ آنے میں چار سال اور دو ماہ لگ گئے۔ لیکن آج حقائق جیت گئے، سچ کی فتح ہوئی ہے، انصاف کی فتح ہوئی ہے۔"

فلپائن: صحافی کے قتل پر احتجاجی مظاہروں کا سلسلہ شروع

عدالتی فیصلے کے حوالے سے ایک بیان میں ریپلر نے اسے "سیاست پر حقائق کی فتح" قرار دیا۔ ویب سائٹ نے عدالت کا شکریہ ادا کرتے ہوئے کہا کہ "اس بات کو تسلیم کرلیا گیا کہ دھوکہ دہی، جھوٹے اور گھٹیا الزامات" سب بے بنیاد تھے۔

نوبل انعام یافتہ صحافی اور ان کی ویب سائٹ کو تاہم اب بھی تین دیگر مجرمانہ مقدمات کا سامنا ہے۔ جن میں سائبر لیبل کا کیس سب سے اہم ہے۔ یہ کیس اپیل کے مرحلے میں ہے اور اگر ریسا اس میں قصوروار قرار پاتی ہیں تو انہیں تقریباً سات برس قید کا سامنا کرنا پڑ سکتا ہے۔

ریپلر کا ٹیکس چوری کا الزام کیوں لگایا گیا؟

ماریا ریسا نے غلط اطلاعات کا مقابلہ کرنے اور فلپائن کے سابق صدر روڈریگو ڈیوٹرٹے  کی جانب سے اپنے دور حکومت میں انسانی حقوق کی خلاف ورزیوں کی دستاویز بندی کرنے کے لیے ریپلر کی بنیاد رکھی تھی۔ روڈریگو پر الزام ہے کہ انہوں نے منشیات کے خلاف مہلک جنگ کے دوران انسانی حقوق کی بڑے پیمانے پر خلاف ورزی کی۔

بدعنوان افراد اور جرائم پیشہ گروہ ہو شیار رہیں، ڈوٹیرٹے

منشیات کے خلاف جنگ، فلپائن پولیس کے ’حوصلے جوان‘

سن 2012 میں شروع کیے گئے ریپلر فلپائن کے مقبول ترین ویب سائٹوں میں سے ایک ہے۔ فلپائنی حکام نے سن 2018 کے ایک حکم نامے کی توثیق کرتے ہوئے گزشتہ برس جون میں اس ویب سائٹ کو بند کرنے کا حکم دیا تھا۔

ویب سائٹ کو بند کرنے کا حکم اور ٹیکس چوری کے الزامات ریپلر پر ایک آئینی شق کی خلاف ورزی کے الزام پر مبنی تھے۔ یہ آئینی شق فلپائن میں غیر ملکی ملکیت اور میڈیا کمپنیوں کے کنٹرول پر پابندی لگاتا ہے۔

سیکورٹیز اینڈ ایکسچینج کمیشن نے ریپلر پر غیرملکی سرمایہ کارو ں بشمول اومیڈیار نیٹ ورک اور نارتھ بیس میڈیا سے فنڈ حاصل کرنے کے الزامات عائد کیے تھے۔

صحافیوں کے تحفظ اور میڈیا کی آزادی کے لیے نیا یورپی قانون

عدالت نے بدھ کے روز اپنے فیصلے میں کہا کہ جن مالیاتی دستاویزات کے ذریعہ ادائیگیاں کی گئیں ان پر ٹیکس عائد نہیں ہوتے۔

ریپلر کے خلاف کیس کا مستقبل تاہم اب بھی واضح نہیں ہے۔

ج ا/ ص ز (اے ایف پی روئٹرز)