موٹر ریسنگ: فیرشٹاپن مسلسل دوسری بار عالمی چیمپیئن بن گئے
9 اکتوبر 2022
اس وقت پچیس سالہ فیرشٹاپن کے لیے اتوار نو اکتوبر کا دن دوہری خوشی کا دن ثابت ہوا۔ پہلے انہوں نے امسالہ عالمی چیمپیئن شپ کی آج اتوار کو شہر سوزوکا میں ہونے والی جاپانی گراں پری ریس جیت لی۔ اس کے بعد اسی ریس کے نتیجے میں لیکن اس کھیل کی نگران عالمی تنظیم کے ایک فیصلے کے بعد یہ ڈچ ڈرائیور قبل از وقت ہی ایک بار پھر ورلڈ چیمپیئن بھی بن گئے۔
کبھی نہ ہارنے والا بھی ہار گیا: نکی لاؤڈا انتقال کر گئے
جاپانی گراں پری مقابلے میں سوزوکا کے سرکٹ پر فاتح ڈرائیور فیرشٹاپن کے بعد ریڈ بُل ٹیم میں انہی کے ساتھی ڈرائیور سیرجیو پیریز تیسرے نمبر پر رہے تھے جبکہ دوسرے نمبر پر فیراری ٹیم کے موناکو سے تعلق رکھنے والے سٹار ڈرائیور شارل لکلارک رہے تھے۔
لکلارک کو پانچ سیکنڈ کی سزا
جاپانی گراں پری خراب موسم اور بہت تیز بارش کے باعث تاخیر سے شروع ہوئی تھی اور اس کا دورانیہ بھی کم کر دیا گیا تھا۔ ریس کے اختتام پر کامیابی فیرشٹاپن کو ملی جو ان کی موجودہ سیزن میں بارہویں فتح تھی۔
فارمولا ون ریس: ڈرائیورز پر بالیاں، انگوٹھیاں اور غیر محفوظ انڈرویئر پہننے پر پابندی
لیکن دوسرے نمبر پر رہنے والے فیراری ٹیم کے ڈرائیور لکلارک کی ایک غلطی کی وجہ سے ریس ختم ہو جانے کے بعد جب انہیں پانچ سیکنڈ کی سزا سنائی گئی، تو ان کی سوزوکا میں پوزیشن دوسری سے تیسری ہو گئی اور پہلی دونوں پوزیشنیں ریڈ بُل ٹیم کے دونوں ڈرائیوروں کے حصے میں آ گئیں۔
جاپانی گراں پری، لوئس ہیملٹن کی بڑی کامیابی
ماکس فیرشٹاپن نے اپنے فارمولا ون موٹر ریسنگ کیریئر میں پہلی عالمی چیمپیئن شپ ابھی گزشتہ برس ہی جیتی تھی اور اس سال انہوں نے اپنے اعزاز کا وقت سے بہت پہلے اور کامیابی سے دفاع بھی کر لیا۔
اس سال فیرشٹاپن سے آگے نکلنا ناممکن
ریڈ بل ٹیم کے اس ڈچ ڈرائیور کے عالمی اعزاز کی خاص بات یہ بھی ہے کہ وہ فارمولا ون موٹر ریسنگ کے امسالہ سیزن میں ابھی سے ورلڈ چیمپیئن بن گئے ہیں حالانکہ موجودہ سیزن کے چار مقابلے ابھی باقی ہیں۔
پاکستانی طلبہ کی تیار کردہ ریسنگ کار، بین الاقوامی مقابلے میں
اس کا سبب یہ ہے کہ سوزوکا سرکٹ سے پہلے تک رواں برس 11 دوڑیں جیت کر فیرشٹاپن نے اتنے زیادہ پوائنٹس جمع کر لیے تھے کہ وہ اگلی گراں پری میں معمولی سے پوائنٹس لے کر بھی لازماﹰ اس سال کے عالمی چیمپین بھی بن ہی جاتے۔ انہیں اپنے لیے اس دوسرے چیمپیئن شپ ٹائٹل کو یقینی بنانے کے لیے جاپانی گراں پری جیتنے کے بعد بس چند پوائنٹس ہی کی ضرورت تھی۔
فارمولا ون ڈرائیور سیباستیان فیٹل نے ریٹائرمنٹ کا اعلان کر دیا
جب فارمولا ون ریسنگ کی نگران عالمی تنظیم ایف آئی اے نے اپنے انتظامی فیصلے میں لکلارک کو پانچ سیکنڈ کی سزا سنائی تو دوسری پوزیشن کے مقابلے میں ان کے تیسری پوزیشن پر چلے جانے سے فیرشٹاپن کے مجموعی پوائنٹس اور ان کا لکلارک سے پوائنٹس کا فرق دونوں اتنے زیادہ ہو گئے کہ پھر 2022ء کا عالمی چیمپیئن کھلاڑی اس ڈچ ڈرائیور کے علاوہ کوئی اور بن ہی نہیں سکتا تھا۔
اب فیرشٹاپن سال رواں کی رینکنگ میں ورلڈ ٹائٹل کے لیے اتنے آگے جا چکے ہیں کہ باقی چاروں ریسیں اگر ان کا کوئی قریب ترین حریف جیت بھی جائے تو بھی وہ فیرشٹاپن سے آگے نہیں نکل سکے گا۔
م م / ع آ (روئٹرز، ایس آئی ڈی، اے پی)