مونٹی نیگرو میں عام انتخابات، یورپی یونین میں داخلہ مرکزی موضوع

اتوار کے روز ملک کے پانچ لاکھ 14 ہزار اہل ووٹروں نے پارلیمان کی 81 نشستوں کے لیے ووٹ ڈالے۔ ان انتخابات میں 13 سیاسی جماعتوں نے حصہ لیا تاہم عوامی جائزوں کے مطابق حکمران اتحاد میں شامل سب سے بڑی جماعت DPS ممکنہ طور پر ان انتخابات میں بھی برتری حاصل کرنے میں کامیاب ہو جائے گی۔ یہ جماعت سن 2006ء میں ملک کی سربیا سے مکمل آزادی کے بعد سے اب تک حکومت میں شریک رہی ہے۔ اس وقت بھی یہ سینٹر لیفٹ جماعت اس وقت دیگر چھوٹی جماعتوں کے ساتھ مل کر حکومت کر رہی ہے۔

DPS کے مقابلے میں سب سے اہم جماعت یونائیٹڈ ڈیموکریٹک فرنٹ ہے۔ ملک کو درپیش معاشی بحران کی وجہ سے انتخابات کا مرکزی موضوع ملکی معیشت میں بہتری کے وعدے ہی رہا۔ تاہم یورو زون کرنسی کو لاحق بحران اور ملک کی بطور رکن ریاست یورپی یونین میں شمولیت کے حوالے سے بھی ملکی سطح پر خاصی بحث دیکھی گئی۔

عوامی جائزوں کے مطابق حکمران اتحاد 47 فیصد ووٹ حاصل کر سکتا ہے جبکہ اپوزیشن جماعتوں کو 40 فیصد کے قریب ووٹ ملنے کی توقع ہے۔ Djukanovic کی سربراہی میں DPS نے اب تک تمام ملکی انتخابات جیتے ہیں۔ 50 سالہ Djukanovic ملک کی آزادی سے اب تک وزیراعظم اور صدر کے عہدوں پر فائز رہ چکے ہیں۔ بلقان ریاستوں میں DPS وہ واحد جماعت ہے جو ملکی آزادی کے بعد سے اب تک ہر بار برسراقتدار رہنے میں کامیاب رہی ہے۔

دوسری جانب اپوزیشن جماعتیں DPS حکومت پر بدعنوانی کے الزامات عائد کرتی ہیں۔ ان جماعتوں کا یہ بھی اعتراض ہے کہ حکومت سربیا سے تعلقات میں مضبوطی پیدا کر کے ایک طرف تو ملکی آزادی کو کمزور کر رہی ہے اور دوسری جانب ملک میں بے روزگاری کی شرح میں مسلسل اضافہ بھی ہو رہا ہے۔ واضح رہے کہ مونٹی نیگرو میں بے روز گاری کی شرح 20 فیصد سے بڑھ چکی ہے۔

at /ij (AFP)