مودی کے ساتھ کام کرنے کے لیے تیار ہیں، بنگلہ دیشی وزیر اعظم

خبر رساں ادارے اے ایف پی نے ٹوکیو سے موصول ہونے والی اطلاعات کے حوالے سے بتایا ہے کہ بنگلہ دیشی وزیر اعظم حسینہ واجد نے کہا ہے کہ نریندر مودی کے جو بھی خیالات ہوں لیکن وہ بھارت کے وزیر اعظم کے طور پر اپنی ذمہ داریاں اچھے طریقے سے نبھائیں گے۔

اپنے چار روزہ دورہ جاپان کے دوران بروز بدھ ٹوکیو میں ایک پریس کانفرنس کے دوران اس خاتون وزیر اعظم نے کہا، ’’ ان (نریندر مودی) کے اپنے خیالات ہیں۔ اب وہ بھارت کے وزیر اعظم منتخب ہو چکے ہیں اور میں امید کرتی ہوں کہ ان کا عمل بھارتی وزارت عظمیٰ کے منصب کے مطابق ہو گا۔‘‘

تیسری مرتبہ وزارت عظمیٰ کے عہدے پر فائز ہونے والی حسینہ واجد نے اپنے دور اقتدار کے دوران بھارت کی چار مختلف حکومتوں کے ساتھ کام کر رکھا ہے جبکہ بھارتیہ جنتا پارٹی کی نومنتخب حکومت ایسی پانچویں حکومت ہو گی، جس کے ساتھ وہ کام کریں گی۔ حسینہ واجد کے بقول، ’’ہم اپنے مضبوط ہمسایہ ملک بھارت کے ساتھ اچھے باہمی تعلقات برقرار رکھنے کے خواہاں ہیں۔‘‘

حالیہ بھارتی انتخابات میں تاریخی کامیابی حاصل کرنے کے بعد مودی نے پیر کے دن بطور وزیر اعظم حلف اٹھایا تھا۔ جہاں بھارت کی مسلم آبادی مودی کے کٹر نظریات کے حوالے سے شکوک کا شکار ہیں وہیں اس قوم پرست پارٹی کے اندرونی حلقے بھی مودی کو انہی نظریات کے حامل ایک سیاستدان کے طور پر دیکھتے ہیں۔ 2002ء میں ہوئے گجرات فسادات کے تناظر میں مودی کو پاکستان میں بھی مشکوک انداز سے دیکھا جاتا ہے۔

تاہم حسینہ واجد کا کہنا ہے کہ مسلم اکثریتی ملک بنگلہ دیش کے بھارت کے ساتھ ہمیشہ ہی اچھے تعلقات رہے ہیں اور باہمی اختلافات کو مذاکرات کے ساتھ دور کیا جاتا رہا ہے۔ انہوں نے مزید کہا، ’’اگر کوئی مسئلہ ہے تو میرا یقین ہے کہ باہمی مذاکرات کی مدد سے اس کا حل تلاش کیا جا سکتا ہے۔‘‘ انہوں نے اصرار کیا کہ علاقائی سطح پر تمام ممالک کا سب سے بڑا مشترکہ دشمن غربت ہے، جسے اقتصادی ترقی کے منصوبہ جات کے تحت شکست دی جا سکتی ہے۔

بنگلہ دیشی وزیراعظم نے یہ بھی واضح کیا کہ ڈھاکا حکومت کی خارجہ پالیسی بہت سیدھی اور شفاف ہے یعنی سب کے ساتھ دوستی اور اچھے تعلقات۔