موج اور مستی کا میلہ: اکتوبر فیسٹیول شروع ہو گیا

جرمنی کی وفاقی ریاست باویریا کے دارالحکومت میونخ کے میئر ڈیٹر رائٹر نے ہفتہ اکیس ستمبر کو اکتوبر فیسٹیول کا باضابطہ افتتاح کیا۔ افتتاحی تقریب میں میونخ شہر کے میئر نے بیئر کے ایک بیرل کو ایک بڑی ہتھوڑی کی ضرب سے کھولا۔ ہتھوڑی کی ضرب لگتے اس خصوصی تقریب کے لیے جمع سینکڑوں شرکاء نے تالیاں بجانا شروع کر دیں اور کچھ من چلوں نے سیٹیاں بجانے سے بھی گریز نہیں کیا۔

مقامی طور پر اکتوبر فیسٹ کو 'ویزن‘ کا نام بھی دیا جاتا ہے۔ میئر ڈیٹر رائٹر نے تمام شرکاء کے لیے نیک تمناؤں کے ساتھ ساتھ اس خواہش کا اظہار کیا کہ کہ وہ 'ویزن‘ کے ایام کے دوران خوش و خرم اور محفوظ رہیں۔ انہوں نے افتتاحی تقریب کے بعد میلے کے انتظامات کا جائزہ بھی لیا۔ اس موقع پر سکیورٹی کے خصوصی انتظامات بھی کیے گئے ہیں۔ میلے کے تمام ایام کے دوران پولیس نگرانی کے گشت میں مصروف رہے گی۔

ایک سو چھیاسی واں ایڈیشن

ہفتے سے شروع ہونے والا اکتوبر فیسٹیول اس میلے کا ایک سو چھیاسی واں ایڈیشن ہے۔ افتتاحی روز خوشگوار موسم کو اچھا شگون قرار دیا گیا ہے۔ اس بیئر فیسٹیول میں مختلف اقسام کی بیئر شوقین حضرات کے لیے پیش کی جاتی ہیں۔ مختلف بیئر بنانے والی کمپنیوں کے خصوصی خیمے نصب ہیں۔ ان میں حسین لڑکیاں خوش رنگ لباسوں میں ملبوس ہو کر شرکاء کو بیئر پیش کرنے میں مصروف ہیں۔

اوکٹوبر فیسٹ

اکتوبر فیسٹیول کو مقامی سطح پر ''اوکٹوبر فیسٹ‘‘ کہا جاتا ہے۔ اس میلے کے انعقاد پر جنوبی جرمن شہر میونخ اور اس کے قرب و جوار کے قصبوں اور شہروں کے تمام ہوٹل بُک ہو چکے ہیں، سڑکوں پر ٹریفک زیادہ ہو گئی ہے اور میلے کی سمت جانے والی بسیں اور میٹرو مسافروں سے بھری ہوئی ہیں۔

انتظامیہ کو امید ہے کہ اگلے سولہ دن تک اس میلے میں تقریباً چھ ملین یا ساٹھ لاکھ سے زائد افراد شریک ہو کر اس میلے کی رونق کو دوبالا کریں گے۔

اوکٹوبر فیسٹ کو دنیا بھر میں بیئر کا سب سے بڑا فیسٹیول قرار دیا جاتا ہے۔ شریک ہونے والے لاکھوں حضرات جرمنی کے علاوہ یورپی براعظم کے ساتھ ساتھ کئی دوسرے ممالک سے بھی پہنچتے ہیں۔ اس میلے کے لیے کئی مشہور ماڈل اور سوشلائٹس خواتین بھی ہر سال خاص طور پر مدعو کی جاتی ہیں۔

اکتوبر فیسٹیول کی شروعات

اکتوبر فیسٹیول سن 1810 میں بارہ اکتوبر کو میونخ میں منعقد کرنے کا فیصلہ ایک شاہی شادی کے موقع پر کیا گیا تھا۔ پانچ روزہ پرمسرت تقریب منانے کی وجہ اس وقت کے ولی عہد لڈوگ کا شہزادی تھیریزے فان زاکسن ہلڈبرگاؤزن سے شادی تھی۔ ولی عہد بعد میں بادشاہ لڈوگ ( اول) کے نام سے مشہور ہوئے۔ پھر کئی برسوں تک ہر سال اس موقع پر لوگ اکھٹے ہوتے اور موج مستی کرتے۔

ع ح ⁄ اا (ڈی پی اے، اے پی)