سماجی رابطے لازماً کم کر دیں، میرکل کا قوم سے خطاب

جرمن چانسلر میرکل نے بدھ کی شام ٹیلی وژن پر اپنے خطاب میں کہا،''عزیز ہم وطنو! کورونا وائرس نے آج کل ہمارے ملک کے نظام زندگی کو تبدیل کر رکھا ہے۔ معمول کی زندگی کے بارے میں ہمارا تصور، عوامی زندگی یا میل جول، ایک دوسرے کے ساتھ سماجی رابطے، سب کچھ بدل گیا ہے۔ ان تمام چیزوں نے ہمیں ایک ایسے بہت بڑے امتحان میں ڈال دیا ہے، جس کا ہم نے پہلے کبھی سامنا نہیں کیا۔‘‘

میرکل نے مزید کہا کہ صورتحال سنگین ہے اور اسے بہت سنجیدگی سے لیا جانا چاہیے۔ ان کے بقول، ''جرمنی کے دوبارہ اتحاد بلکہ دوسری عالمی جنگ کے بعد سے ہمارے ملک کو کبھی کسی ایسے چیلنج کا سامنا نہیں کرنا پڑا تھا، جس کا ہماری باہمی یکجہتی پر اس قدر انحصار ہو۔‘‘ 

انہوں نے مزید کہا کہ جرمنی کا نظام صحت بہترین ہے، شاید یہ دنیا کا بہترین نظام ہے اور یہ جرمن قوم کو اعتماد دیتا ہے، ''لیکن اگر  بہت ہی کم وقت میں  کورونا وائرس کے بہت سے مریضوں کو ہسپتالوں میں داخل کر دیا جاتا ہے، تو ہمارے ہسپتالوں کا نظام بھی درہم برہم ہو جائے گا۔‘‘

انگیلا میرکل نے مزید کہا کہ ضرورت اس بات کی ہے کہ اس وائرس کی جرمنی کی جانب بڑھنے اور اس کے پھیلنے کی رفتار کو کم کیا جائے، ''اس کے لیے ضروری ہے کہ روز مرہ کے معاملات کو تبدیل کیا جائے اور سماجی رابطوں کو بھی کم کیا جائے۔‘‘ ان کے  بقول،''ہمیں اس خطرے کو  کم سے کم کرنا ہو گا کہ یہ وائرس کسی ایک انسان سے دوسرے میں منتقل ہو۔‘‘

چانسلر میرکل عام طور پر سال نو یا کرسمس کے موقع پر ہی عوام سے نشریاتی خطاب کرتی ہیں۔ اسی لیے ٹیلی وژن پر ان کے آج شام کے اس خطاب کو غیر معمولی کہا جا رہا ہے۔

میرکل نے اپنے خطاب کے آخر میں کہا کہ یہ ایک تاریخی ذمہ داری ہے، جس کو صرف مل جل کر ہی پورا کیا جا سکتا ہے، ''مجھے مکمل یقین ہے کہ ہم اس بحران پر قابو پا لیں گے۔ تاہم اس دوران ہلاکتیں کتنی ہوں گی؟ ہم سے جدا ہونے والے ہمارے پیاروں کی تعداد کتنی ہو گی، اس کا دارومدار بھی ہم پر ہی ہے۔‘‘

ع ا / م م