مصر میں ایوان بالا کے انتخابات کا عمل تیز کرنے کا اعلان

یہ انتخابات انتیس جنوری سے گیارہ مارچ تک کے عرصے میں تین مرحلوں میں ہونا طے تھے، لیکن عسکری حکام کے تازہ اعلان کے تحت اب انہیں دو مرحلوں تک محدود کر دیا گیا ہے۔ یوں یہ عمل بائیس فروری کو مکمل ہو جائے گا۔

مصر کے سرکاری خبر رساں ادارے مینا نے یہ بات فیلڈ مارشل حسین طنطاوی کے اعلامیے کے مطابق بتائی ہے۔

مصر کی مشاورتی کونسل نے گزشتہ ہفتے ہی بتا دیا تھا کہ مظاہرین اور سیاستدانوں کی جانب سے اقتدار کی سویلین حکام کو منتقلی کا عمل تیز بنانے کے مطالبوں کے تناظر میں حکام کو الیکشن کا عمل محدود بنانے کی تجویز پیش کی گئی ہے، جس پر وہ غور کر رہے ہیں۔

مشاورتی کونسل کے رکن شریف زھران نے بتایا تھا کہ عسکری کونسل الیکشن کا عمل دو ہفتے قبل، بائیس فروری کو، مکمل کرنے کی تجویز پر غور کے لیے تیار ہو گئی ہے۔

انہوں نے کہا تھا کہ عدلیہ بھی انتخابات کو دو مرحلوں میں مکمل کرنے کی تجویز سے متفق ہے اور ووٹوں کی گنتی کا وقت محدود کرنے کے منصوبے پر بھی غور کیا جا رہا ہے۔ زھران کا مزید کہنا تھا کہ اس طرح فروری کے آخر میں پارلیمنٹ اور شوریٰ (دونوں ایوانوں) کا مشترکہ اجلاس بھی ممکن ہو سکے گا۔

نئی حکومت آنے پر مصر میں آئین تشکیل دیا جائے گا اور جون سے قبل صدارتی انتخابات بھی کرائے جائیں گے۔ مصر میں بیشتر افراد کا خیال ہے کہ فوج اصلاحات کا مشکل عمل انجام دینے اور سکیورٹی کا انتظام چلانے کے لائق نہیں رہی۔

خیال رہے کہ ایوان بالا کے الیکشن کی طرز پر ایوانِ زیریں کے لیے پولنگ پہلے ہی جاری ہے، جو نومبر کے وسط میں شروع ہوئی تھی اور جنوری کے وسط میں اختتام کو پہنچے گی۔

ایوان بالا کے انتخابات کے پہلے مرحلے میں تیرہ صوبوں میں پولنگ ہو گی، جن میں قاہرہ اور اسکندریہ جیسے بڑے شہر بھی شامل ہیں۔

رپورٹ: ندیم گِل / خبر رساں ادارے

ادارت: عاطف بلوچ