مشرق وسطیٰ کی صورتحال، عرب لیگ کے سربراہ ماسکو روانہ
8 اکتوبر 2023
ہفتے کے روز فلسطینی عسکریت پسند تنظیم حماس کی طرف سے اسرائیل پر کیے جانے والے غیر متوقع اور اچانک حملوں کے بعد سے مشرق وسطیٰ میں صورتحال تشویشناک حد تک کشیدہ ہو گئی ہے۔ اتوار کو عرب لیگ کے سربراہ احمد ابو الغیث روسی حکام کے ساتھ مذاکرات کی غرض سے ماسکو روانہ ہو گئے ہیں۔
گزشتہ کئی سالوں میں حماس کی طرف سے اسرائیل پر ہونے والے سب سے بڑے حملے کے بعد پورے خطے سمیت عالمی سطح پر تشویش بڑھ گئی ہے۔ عرب لیگ کے سربراہ احمد ابو الغیث ماسکو میں روسی وزیر خارجہ سیرگئی لاوروف سےملاقات کریں گے۔
احمد ابو الغیث مصر میں حسنی مبارک کے اقتدار کے آخری سات سالوں کے دوران مصر کے وزیر خارجہ رہ چُکے ہیں۔ ان کے روس کے دورے کے بارے میں قاہرہ میں قائم عرب ریاستوں کی لیگ کے ایک ترجمان نے ایک بیان میں کہا، ''عرب لیگ کے سربراہ غزہ پٹی میں جاری کشیدگی کے بارے میں روسی وزیر خارجہ سے بات چیت کریں گے۔‘‘
ہفتہ سات اکتوبر کو ہونے والے حماس کے حملے کے بعد روس نے شدید تشویش کا اظہار کرتے ہوئے فریقین سے فوری جنگ بندی کا مطالبہ کیا تھا۔ ساتھ ہی روس نے تنازعہ مشرق وسطیٰ کے حل کے لیے بنائے گئے'' کوارٹیٹ‘‘ یا چار فریقی ثالثی گروپ کو بلاک کرنے کا الزام بھی عائد کیا۔
ماسکو نے اس امر پر زور دیا ہے کہ مشرق وسطیٰ کے تنازعے کے حل کے لیے باقاعدہ مذاکرات ناگزیر ہیں تاکہ 1967ء کی سرحدوں کے ساتھ ایک آزاد فلسطینی ریاست کے قیام کو ممکن بنایا جا سکے جس کا دارالحکومت مشرقی یروشلم ہو۔
ماسکو میں روسی وزارت خارجہ کی ایک خاتون ترجمان ماریا زاخا رووا نے اپنے ایک بیان میں کہا، ''ہم مشرق وسطیٰ میں موجودہ بڑے پیمانے پر کشیدگی میں اضافے کو ایک شیطانی دائرے کا انتہائی خطرناک مظہر سمجھتے ہیں۔
اس کی وجہ فلسطینی ریاست کے بارے میں اقوام متحدہ اور اس کی سلامتی کونسل کی متعلقہ قراردادوں کی تعمیل کرنے میں مسلسل ناکامی اورمشرق وسطیٰ کوارٹیٹ کے کاموں میں مغرب کی طرف سے رکاوٹ ہے۔‘‘ واضح رہے کہ مذکورہ مشرق وسطیٰ کوارٹیٹ روس، امریکہ، یورپی یونین اور اقوام متحدہ پر مشتمل ایک بین الاقوامی ثالثی گروپ ہے جسے روس نے تشکیل دیا تھا۔
دریں اثناء ہفتے کے روز فلسطینی عسکریت پسند گروپ حماس کی طرف سے اسرائیل پر ہونے والے حملے کے بعد یورپی ملک فرانس نے تل ابیب کے لیے اپنی تمام فلائٹس فی الحال معطل کر دی ہیں۔‘
ک م/ا ب ا (روئٹرز)