ماسک نہ پہننے پر کيوں ٹوکا؟ مسافر نے ٹکٹ چيکر کو مکا دے مارا

جرمن شہر ہيمبرگ ميں ايک حيرت انگيز واقعہ پيش آيا۔ ايک ٹرين پر سفر کے دوران ايک مسافر نے چہرے پر حفاظتی ماسک نہيں پہن رکھا تھا۔ يہ ديکھ کر ٹکٹ چیک کرنے والے نے متعلقہ شخص سے مطالبہ کيا کہ وہ قوانين کا احترام کرتے ہوئے اپنے چہرے پر ماسک پہنے اور اپنا ٹکٹ چيک کرائے۔ اس پر مسافر نے مشتعل ہو کر ٹکٹ چيک کرنے والے کو مکا دے مارا۔

دو ہزار بیس: جرمن ٹرین ٹکٹ کی قیمتیں گرگئیں

جرمنی میں ٹرینیں خالی اور مسافر غائب مگر سروس جاری

يہ واقعہ گزشتہ ہفتے ہيمبرگ سے آہرنس برگ جانے والی ايک ٹرين پر پيش آيا۔ مذکورہ مسافر شام کے وقت ٹرين پر کسی بھی قسم کے حفاظتی ماسک کے بغير چڑھا۔ پہلے جب ٹکٹ چيک کرنے والی ڈوئچے بان کی خاتون کارکن نے اس سے ٹکٹ چيک کرانے کا کہا، تو وہ ٹرين ميں موجود ٹوائلٹ میں گھس گیا  اور وہاں سے ايک مصنوعی ماسک باندھ کر باہر نکلا۔ پھر جب ٹرين ہيمبرگ ٹونڈورف اسٹيشن پر رکی، تو وہ باہر بھاگ گيا۔ مگر کہانی يہاں ختم نہ ہوئی۔ مذکورہ مسافر ٹرين  دوبارہ چلنے سے قبل اچانک واپس لوٹا اور اس نے خاتون ٹکٹ چکر کو مکا دے مارا۔

اس واقعے کے بعد خاتون ٹکٹ چکر معمولی زخمی ہو گئی اور ان کے چہرے سے خون نکلنے لگا۔ انہيں فوری طبی امداد فراہم کی گئی۔ ابتدائی مدد مسافروں نے فراہم کہ اور بعد ميں پوليس جائے وقوعہ پر پہنچ گئی۔

ملزم اس کارروائی کے بعد موقع سے فرار ہو گيا اور اطلاع ہے کہ ٹيکسی لے کر کہيں چلا گيا۔ پوليس نے اس کی تلاش جاری رکھی ہوئی ہے۔ جرمنی کی وفاقی پوليس نے اس واقعے کی تحقيقات کی ذمہ داری لے لی ہے۔ لوگوں سے اپيل کی گئی ہے کہ ملزم کی شناخت اور گرفتاری کے ليے ہر ممکن مد کی جائے۔

يہ امر اہم ہے کہ نئے کورونا وائرس کی دوسری لہر سے بچنے کے ليے جرمنی ميں پبلک ٹرانسپورٹ پر ماسک پہننا لازمی ہے۔ ڈوئچے بان نے چند روز قبل ہی کہا تھا کہ اس قانون پر عملدرآمد يقينی بنانے کے ليے ٹرينوں پر اضافی چيکرز تعینات کیے جائیں گے۔

ع س / ک م )جينيفر کمينو گونزالس(