لیبیا میں خانہ جنگی کے فریق مستقل جنگ بندی پر راضی ہو گئے

اقوام متحدہ کے سیکرٹری جنرل انٹونیو گوٹیرش کے خصوصی نمائندے اور لیبیا میں عالمی ادارے کے امدادی مشن (UNSMIL) کے سربراہ غسان سلامے نے منگل چار فروری کو جنیوا میں بتایا کہ اس ملک میں کئی برسوں سے جاری خانہ جنگی کے خاتمے کے کوششوں میں ایک بڑی پیش رفت ہوئی ہے۔

سلامے نے کہا کہ خانہ جنگی کے بڑے فریقین کے مابین جنیوا میں ہونے والی بات چیت میں یہ اصولی اتفاق رائے ہو گیا ہے کہ شمالی افریقہ کی اس ریاست میں عبوری فائر بندی کو مستقل جنگ بندی میں بدل دینا چاہیے۔

غسان سلامے نے کہا، ''اس بارے میں فریقین کے مابین اصولی اتفاق رائے ہو گیا ہے۔ اب یہ طے کرنا باقی ہے کہ اس مستقل فائر بندی کی شرائط کیا ہوں گی۔‘‘

اس بات چیت میں اقوام متحدہ کی تسلیم کردہ لیبیا کی قومی معاہدے کے تحت قائم ہونے والی حکومت یا جی این اے کے نامزد کردہ پانچ اعلیٰ اہلکاروں کے علاوہ اتنی ہی تعداد میں جنگی لیڈر اور لیبین نیشنل آرمی (ایل این اے) کے سربراہ خلیفہ حفتر کے نامزد کردہ پانچ مندوبین بھی حصہ لے رہے ہیں۔

کل پیر تین فروری کو شروع ہونے والے یہ مذاکرات آج منگل کو بھی جاری رہیں گے۔ اس بات چیت میں ثالثی غسان سلامے کر رہے ہیں۔ انہوں نے ابھی گزشتہ ہفتے ہی ان غیر ملکی طاقتوں پر شدید تنقید کی تھی، جو شمالی افریقہ کی اس ریاست میں کئی سالہ خونریز تنازعے میں مداخلت کر رہی ہیں۔

لیبیا 2011ء میں عشروں تک اقتدار میں رہنے والے ڈکٹیٹر معمر قذافی کے خلاف عوامی بغاوت اور ان کی ہلاکت کے بعد سے مسلسل خانہ جنگی کا شکار ہے۔ وہاں علاقائی سطح پر برسراقتدار یہ دو بڑے حریف دھڑے پورے ملک پر اپنے اقتدار کے لیے جنگ لڑ رہے ہیں۔

م م / ع ح (اے ایف پی، ڈی پی اے)