لفتھانزا کا ہزاروں پروازیں منسوخ کرنے کا منصوبہ 

جرمن ایئر لائن لفتھانزا نے موسم سرما کی اپنے مقررہ فلائٹس میں سے 33 ہزار پروازوں کو منسوخ  کرنے کا منصوبہ تیار کیا ہے، یعنی اس کے مجموعی پلان کی تقریباً دس فیصد پروازیں منسوخ کرنی پڑیں گی۔

 ایئر لائن کے سی ای او کارسٹین اسپوہر نے فرینکفرٹ کے ایک مقامی اخبار سے بات چیت میں کہا کہ ٹکٹ کی بکنگ میں شدید مندی دیکھی گئی ہے، خاص طور پر وسط جنوری سے فروری کے درمیان کی مدت میں ٹکٹ کی خرید بہت ہی کم ہے۔

ان کا کہنا تھا، "سب سے اہم بات یہ ہے کہ ہم جرمنی، سوئٹزر لینڈ، آسٹریا اور بیلجیئم کے اپنے گھریلو بازاروں میں مسافروں کی کمی محسوس کر رہے ہیں، کیونکہ یہ ممالک وبائی لہر سے سب سے زیادہ متاثر ہوئے ہیں۔"

اسپوہر کا کہنا تھا کہ کورونا کی وبا کی لہر سے پہلے 2019 کے مقابلے میں صرف 60 فیصد پروازیں ہی چل رہی ہیں اور اس کے توازن میں ابھی تک "تقریبا نصف" مسافر ہی سفر کرتے رہے ہیں۔

ان کا یہ بھی کہنا تھا کہ لفتھانزا اس وقت اپنی موجودہ طے شدہ سروسز اس لیے نہیں فراہم کر رہی ہے کہ اس کی اتنی زیادہ مانگ ہے بلکہ اس لیے کہ اہم ہوائی اڈوں پر ٹیک آف اور لینڈنگ کے اپنے سلاٹ محفوظ رکھنے کے لیے اتنی تعداد میں پروازوں کا چلانا اس کے لیے ضروری ہے۔

ان کا کہنا تھا، "جنوری میں مانگ کم ہونے کی وجہ سے، ہم نے کافی زیادہ پروازیں منسوخ کر دی ہیں۔ لیکن سردیوں میں اپنے ٹیک آف اور لینڈنگ کے حقوق کو محفوظ بنانے کے لیے ہمیں 18,000 غیر ضروری اور اضافی پروازیں کرنی ہوں گی۔"

لفتھانزا یورپ کا سب سے بڑا ایئر لائن گروپ ہے، جس میں یورو ونگس، آسٹریئن، برسلز ایئر لائنز اور سوئز جیسی دیگر ایئر لائن کمپنیاں بھی شامل ہیں۔ وبا کے دوران ایک بدترین دور کے بعد پہلی بار اس برس کی تیسری سہ ماہی میں اس ایئر لائن نے منافع درج کیا۔

بیمار پائلٹس کے سبب بھی پروازیں منسوخ

  کئی پائلٹوں کے بیمار ہونے کی وجہ سے بھی لفتھانزا کی بہت سی پروازیں متاثر ہوئی ہیں اور آئندہ دو ہفتوں کے دوران اس کی وجہ سے تقریبا ایک درجن پروازیں منسوخ کرنی پڑ رہی ہیں۔ اس کی وجہ سے خاص طور پر بوسٹن، ہیوسٹن اور واشنگٹن کے لیے اس کی فلائٹس منسوخ کرنی پڑی ہیں۔

کمپنی کے ایک سینیئر افسر نے جرمن خبر رساں ادارے ڈی پی اے سے بات چیت میں کہا کہ ایسی صورت حال کے لیے پہلے سے ایک حکمت عملی تیار کی گئی تھی تاہم، "جس بڑے پیمانے پر بیماریوں کا سامنا ہے اس کے پیش نظر یہ کافی نہیں ثابت ہوئی۔"  تاہم حکام نے اس بارے میں کوئی وضاحت نہیں کی کہ متاثرہ پائلٹ عام کووڈ وائرس سے متاثر ہیں یا پھر اومیکرون سے۔ کمپنی کے مطابق اتنے زیادہ ملازمین کو ایک ساتھ قرنطینہ کرنا بھی ایک بڑا مسئلہ ہے۔

اطلاعات کے مطابق کرسمس کے موقع پر امریکا کی یونائٹیڈ اور ڈیلٹا ایئر لائنز جیسی کمپنیوں کے بھی پائلٹ اور دیگر اسٹاف کے اومیکرون سے متاثر ہونے کے سبب 90 سے 120 پراوازیں منسوخ کرنی پڑی ہیں۔ دنیا کے بعض دیگر ممالک میں بھی کرسمس جیسے سیزن  کے موقع پر مانگ میں کمی کے سبب پروازوں میں کمی کا فیصلہ کیا ہے۔

ص ز/ ع ب (ڈی پی اے، اے ایف پی، روئٹرز)