قیدیوں کے تبادلے کے لیے تیار ہیں، شامی وزیرخارجہ

روس کے دورے پر پہنچے ہوئے شامی وزیر خارجہ ولید المعلم نے آج جمعہ 17 جنوری کو روسی دارالحکومت ماسکو میں ایک نیوز کانفرنس سے خطاب میں یہ بھی کہا کہ دمشق حکومت باغیوں کے ساتھ ممکنہ قیدیوں کے تبادلے کے لیے بھی تیار ہے اور اس مقصد کے لیے فہرستوں کا تبادلہ کیا جا سکتا ہے۔

شامی وزیر خارجہ ولید المعلم اپنے ایرانی ہم منصب محمد جواد ظریف کے ساتھ بدھ 15 جنوری کی شام ماسکو پہنچے تھے۔ اس دورے کا مقصد 22 جنوری کو طے شام کے حوالے سے بین الاقوامی امن کانفرنس کے حوالے سے اپنے دو اہم ترین حلیف ممالک سے تبادلہ خیال ہے۔ سوئٹزرلینڈ کے شہر مونٹراکس میں ہونے والی اس کانفرنس کو جنیوا ٹو کا نام دیا گیا ہے۔

ولید المعلم نے اپنے روسی ہم منصب سیرگئی لاوروف سے ملاقات کے بعد صحافیوں سے گفتگو کرتے ہوئے شامی باغیوں کے ساتھ جنگ بندی کے منصوبے پر آمادگی کے حوالے سے بتایا۔ تاہم انہوں نے اس منصوبے کی تفصیلات نہیں بتائیں۔

ولید المعلم کے مطابق: ’’شام کے حوالے سے روس کے نقطہ نظر پر اعتماد اور شام میں خونریزی رکوانے کے لیے اس کے کردار پر اعتماد کے نتیجے میں، میں نے آج حلب شہر کے حوالے سے سکیورٹی انتظامات کے بارے میں منصوبہ وزیرخارجہ لاوروف کے حوالے کر دیا ہے۔‘‘ معلم کا مزید کہنا تھا: ’’میں نے ان سے کہا ہے کہ وہ ضروری انتظامات کریں تاکہ اس پر عملدرآمد اور فوجی آپریشن کو روکنے کے لیے وقت طے کیا جا سکے۔‘‘

شامی وزیرخارجہ کے مطابق اگر لاوروف کی کوششیں کامیاب ثابت ہوتی ہیں تو پھر جنگ بندی کے منصوبے کو شام کے دیگر علاقوں میں بھی لاگو کیا جا سکتا ہے جہاں صدر بشارالاسد کی فوجوں اور باغیوں کے درمیان جنگ جاری ہے۔

روسی وزیر خارجہ سیرگئی لاوروف کا اس موقع پر کہنا تھا کہ شام انسانی ہمدردی کے تناظر میں متعدد اقدامات کرنے کے لیے تیار ہے۔

لاوروف نے جمعرات 16 جنوری کو اپنے ایرانی ہم منصب جواد ظریف سے بھی ملاقات کی تھی۔ انہوں نے مغرب سے پر زور مطالبہ کیا کہ اگلے ہفتے ہونے والی امن کانفرنس میں شامی صدر بشار الاسد کے قریبی حلیف ملک ایران کو بھی شرکت کی دعوت دی جائے۔

شام کی جانب سے جنگ بندی اور قیدیوں کی تبادلے پر آمادگی ایک ایسے وقت پر سامنے آئی ہے جب مغربی حمایت یافتہ شامی اپوزیشن کا گروپ ’سیریئن اپوزیشن کولیشن‘ آج ترکی کے شہر استنبول میں ملاقات کر رہا ہے۔ اس میٹنگ میں طے کیا جائے گا کہ شامی اپوزیشن جنیوا ٹو کانفرنس میں شرکت کرے گی یا نہیں۔