قدرتی وسائل سے مقامی کمیونٹی کو بھی فائدہ ہونا چاہیے، پوپ

کیتھولک مسیحیوں کے روحانی پیشوا، 87 سالہ پوپ فرانسس ان دنوں جنوب مشرقی ایشیا اور 'اوشنیا‘ کے دورے پر ہیں۔ پوپ نے آج ہفتہ سات ستمبر کو پاپوا نیو گِنی میں دارالحکومت پورٹ مورسبی میں مقامی حکام، سول سوسائٹی کے نمائندوں اور سفارت کاروں سے ملاقات کی۔

پوپ فرانسس کا انڈونیشیا میں مذہبی انتہاپسندی کے خلاف انتباہ

انڈونیشیا: پوپ اور مسجد استقلال کے بڑے امام کی امن کی اپیل

انہوں نے اس بات پر زور دیا کہ قدرتی وسائل کو نکالنے اور ان کے قابل استعمال بنانے میں بین الاقوامی کارپوریشنوں کو شامل کرنا 'ضروری‘ ہے، تاہم، ''یہ اسی وقت درست ہے جب آمدنی کی تقسیم اور کارکنوں کو ملازمت دیتے وقت مقامی لوگوں کی ضروریات کو مدنظر رکھا جائے تاکہ ان کے معیار زندگی کو بہتر بنایا جا سکے۔‘‘

پاپوا نیو گنی میں سونے، تانبے اور قدرتی گیس سمیت دیگر معدنیات اور وسائل کے وسیع ذخائر موجود ہیں۔ اس کے باوجود تقریباﹰ ایک کروڑ آبادی کی اکثریت خط غربت سے نیچے زندگی بسر کر رہی ہے۔ بحر الکاہل کے اس ملک میں خاص طور پر چینی اور آسٹریلوی کمپنیاں اس میں بہت فعال ہیں۔

بحر الکاہل کی ریاست

روم سے تقریباﹰ 15 ہزار کلومیٹر کے فاصلے پر واقع پاپوا نیو گنی پوپ فرانسس کے اب تک کے طویل ترین بیرون ملک دورے کا دوسرا پڑاؤ ہے۔

پاپوا نیو گِنی کی صرف ایک چوتھائی آبادی کیتھولک ہے۔ اپنے شیڈول کے ایک حصے کے طور پر ، پوپ فرانسس اتوار کو پورٹ مورسبی کے ایک اسپورٹس اسٹیڈیم میں ایک بڑی دعائیہ عبادت کی سربراہی کریں گے۔

پوپ فرانسس جنوب مشرقی ایشیا اور اوشنیا کے چار ممالک کا دورہ کر رہے ہیں جو 12 دنوں پر محیط ہے۔ پاپوا نیو گِنی کے بعد وہ مشرقی تیمور اور سنگاپور جائیں گے۔ پوپ نے اپنے دورے کا آغاز انڈونیشیا سے کیا تھا۔

ا ب ا/ع ت (ڈی پی اے، اے ایف پی)