فیفا ورلڈ کپ 2014ء، ڈی ڈبلیُو کا تبصرہ

پرانگے نے آج سے برازیل میں شروع ہونے والے فٹ بال کے ورلڈ کپ کے بارے میں اپنے ایک تبصرے میں لکھا ہے کہ اب اس عالمی چیمپئن شپ کو اُسی جذبے اور سوچ کے ساتھ دیکھا جانا چاہیے، جیسے پہلے کبھی ہوا کرتا تھا۔

آخرکار فٹ بال چیمپئن شپ 2014ء کے آغاز کا وقت آ ہی گیا۔ پہلے میچ کی ابتدا پر جیسے ہی برازیل میں گراؤنڈ پر فٹ بال کو پہلی کِک لگے گی ویسے ہی فٹ بال کے شائقین کی توجہ دنیا کے اس انتہائی بڑے اسپورٹس ایونٹ کے منتظمین کی مبینہ کوتاہیوں اور ناقص انتظامات سے ہٹ جائے گی۔ آج سے صرف اور صرف گولز کی تعداد پر تمام تر توجہ مرکوز ہو گی۔ ہر ایک میچ کی جیت کے ساتھ نہ صرف جیتنے والی ٹیم بلکہ پوری قوم کا وقار بلند ہو گا اور اُس پر فخر محسوس کیا جائے گا۔

اس مرتبہ کی فُٹ بال ورلڈ چیمپیئن شپ، میزبان ملک برازیل میں بہت سی تبدیلیوں کا سبب بنی ہے۔ ان تبدیلیوں کے آثار فٹ بال کی بین الاقوامی انتظامی تنظیم فیفا میں بھی دکھائی دے رہے ہیں۔ دنیا بھر میں ہونے والے بڑے بڑے عوامی احتجاجی مظاہروں کے بعد سے مستقبل میں کسی ورلڈ کپ چیمپئن شپ کی فیفا کی شرائط کے مطابق میزبانی کی خواہش میں غیر معمولی کمی واقع ہوئی ہے۔ ستم ظریفی یہ ہے کہ فیفا قوانین میں خامیاں بھی برازیل جیسے ملک میں واضح ہو کر سامنے آئی ہیں، جسے اس کھیل کا گہوارہ سمجھا جاتا ہے۔ یہ ایک طرح سے اچھا بھی ہے۔

برازیل نے فُٹ بال کے عالمی ٹورنامنٹ کی کاروباری بنیادوں پر سوالیہ نشان لگا دیا ہے۔ اس ملک کے 200 ملین باشندے یہ سوال پوچھنے پر حق بجانب ہیں کہ آخر کیسے ایک فُٹ بال ایونٹ کے لیے ملکی آئین اور قوانین کو بالائے طاق رکھا جا سکتا ہے۔ حقیقت یہ ہے کہ برازیل میں ورلڈ کپ سے متعلق نہایت عجلت میں خصوصی قوانین کی منظوری دے دی گئی جن کے تحت برازیل کے اسٹیڈیمز میں شراب لے جانے پر عائد اب تک کی پابندی اُٹھا لی گئی۔ برازیل کے باشندے یہ سوالات اٹھا رہے ہیں کہ آخر فٹ بال فیڈریشن کے ضوابط کے لیے ملکی آئین کو کیوں معطل کر دیا گیا؟ ایسا کیوں کر ممکن ہوا کہ ایک اسپورٹس ایسوسی ایشن اپنے کارروباری شراکت داروں کے ساتھ ایسے معاہدے طے کر لے، جن کا بوجھ عوام پر پڑے اور کئی ملین انسانوں کی نقل و حرکت کی آزادی متاثر ہو؟ برازیل کی عوام کا یہ پیغام حکومت تک پہنچ گیا ہے۔ ملکی صدر دلما روسیف یہ کہتے نہیں تھک رہی ہیں کہ ورلڈ کپ کے باوجود یا اس کپ کی وجہ سے تعلیم اور صحت کے شعبوں میں سرکاری اخراجات بڑھ گئے ہیں۔

فیفا کی چند رکن فُٹ بال ایسوسی ایشنز پر بھی یہ بات ظاہر ہو گئی ہے کہ اتنے بڑے ایونٹ پر آنے والے بہت بڑے اخراجات کی سیاسی وضاحت بہت مشکل ہے۔ یہ صحیح بھی ہے۔ اگر برازیل میں بھی نفع و نقصان کا بٹوارا اُسی طرح غیر مساوی طریقے سے کیا گیا جیسا کہ جنوبی افریقہ میں فیفا ورلڈ کپ کے انعقاد پر ہوا تھا، تو یقیناً سیاسی طور پر اس کی توضیح بہت مشکل ہو گی۔