فٹ بال: فرانس اور پرتگال ورلڈ کپ کے ليے کواليفائی کر گئے

گزشتہ ہفتے يوکرائن کے دارالحکومت کيف ميں کھيلے جانے والے ورلڈ کپ کواليفائنگ کے پلے آف مقابلوں کے پہلے ليگ ميں دو کے مقابلے ميں صفر سے ہارنے کے بعد فرانسيسی ٹيم کے آئندہ برس برازيل جانے کے امکانات کافی کم تھے۔ تاہم منگل کی شب اپنی ميزبانی ميں کھيلے جانے والے پلے آف مقابلوں کی دوسری ليگ ميں ايک سنسنی خير مقابلے کے بعد فرانس نے يوکرائن کو تين کے مقابلے ميں صفر سے شکست دے دی۔ يوں فرانس مجموعی طور پر تين کے مقابلے ميں دو گول کے ساتھ ورلڈ کپ کے ليے کواليفائی کر گيا۔

منگل کی شب کھيلا جانے والا ايک اور اہم ميچ پرتگال اور سويڈن کے مابين ہوا، جسے ہزارہا شائقين عالمی فٹ بال کے دو شاندار کھلاڑيوں کے مابين مقابلہ قرار دے رہے تھے۔ اور ان کا اندازہ غلط نہ تھا۔ اس ميچ پر سويڈن کے ذلاٹان ابراہيم ووچ اور پرتگال کے کرسٹيانو رونالڈو چھائے رہے۔ ميچ ميں کل پانچ گول اسکور کيے گئے، جن ميں سے ابراہيم ووچ نے دو اور رونالڈو نے تين اسکور کيے۔ رونالڈو کی ہيٹ ٹرک کی مدد سے اس ميچ کا نتيجہ تين۔دو سے پرتگال کے حق ميں رہا۔ دونوں ٹيموں کے مابين پہلے ليگ کا مقابلہ بھی پرتگال نے ايک۔صفر سے جيتا تھا۔ يوں چار۔دو کے مجموعی اسکور کے ساتھ پرتگال اگلے سال ہونے والے ورلڈ کپ کے ليے کواليفائی کر گيا۔

گزشتہ شب کھيلے گئے ورلڈ کپ کواليفائنگ کے پلے آف مقابلوں ميں کروشيا اور يونان نے بھی اس ٹورنامنٹ کے ليے کواليفائی کر ليا۔ ان دونوں ٹیموں نے بالترتیب آئس لینڈ اور رومانیہ کا سامنا کیا تھا۔

دوستانہ ميچ ميں انگلينڈ کو جرمنی کے ہاتھوں شکست

گزشتہ روز انگلينڈ ميں ويمبلی پر کھيلے گئے ايک ميچ ميں جرمنی نے ایک دوستانہ فٹ بال میچ میں ميزبان ملک کی ٹيم کو صفر کے مقابلے میں ایک گول سے شکست دے دی۔ اس میچ کا واحد گول کپتان پیر میرٹے زاکیر نے کیا۔ انگلینڈ کو چھتيس برس میں پہلی مرتبہ یکے بعد دیگرے ہوم گراؤنڈ پر شکست کا سامنا کرنا پڑا ہے۔ ابھی جمعے کو چلی نے انگلینڈ کو صفر کے مقابلے میں دو گول سے مات دی تھی۔ بعدازاں جرمن کوچ یوآخم لو نے کہا کہ ویمبلی کے اس تاریخ مقام پر جیت پر وہ بے حد خوش ہیں۔